Thresor de la langue françoise/Tarascon
tarascon, ville de Prouēce, assise és confins d'icelle sur le rosne vis à vis de Beaucaire, ville faisant à l'opposite vn limite du pays de Languedoc, icelles deux villes separées par ladite riuiere de Rosne courant entre deux, dont est le dicton vsité parmi les gens d'icelles, Entre Beaucaire & Tarascon ne paist ne brebis ne mouton, Tarasco, Ceste ville est ramenteuë en plusieurs escrits des hommes doctes de cest aage, pour la rare pieté, saincteté de mœurs & sçauoir aux lettres Latines de sœur Scholastique Bectone abbesse des Nonains dudit lieu, laquelle auoit tant profité en la lecture de Ciceron & d'autres auteurs signalez ses contemporanées, que les escrits d'elle estoyent parangonnez à ceux des plus grands Ciceroniens de son temps. La renommée dequoy meut le Roy François premier & la Royne de Nauarre sa sœur, tous deux grands zelateurs des personnes lettrées, d'aller sur le lieu pour la voir, ce que Guillaume Bude, le lustre de ce royaume, Macrin & plusieurs autres de ceste marque firent aussi pour mesme occasion, la vie d'elle à esté mise par escrit par Lodouico Domenichi, en son liure, De la nobilta d'elle donne.
Qui est de Tarascon, Tarasconensis.