Thresor de la langue françoise/Tollieu
Tollieu, m. acut. Qu'aucuns escriuent & prononcent Toulieu, est vn mot frequent & vsité aux traictez de paix & de trefues marchandes entre les princes, en l'article des marchans, traffic & commerce, qui dit ainsi, le commerce sera libre. & pourront les marchans d'vne part & d'autre porter & rapporter toutes sortes de marchandises licites & non deffendues, en payant les toulieux anciens & accoustumez. Ainsi Toulieu est autant que Dace, tribut ou droit de peage, passage, rouage foraine & semblables. Le Flamend dit Tol pour ce mesmes, & a nommé Tolen vne petite ville assise en vne Este en Zelande qui en a prins le nom, par ce que le tol, c'est à dire le Tollieu du peage souloit estre acquitté en icelle villette. Le mot François & le Flamen viennent du Latin, Tollo, (Dont vient aussi Maletoste, qu'on deust escrire par ceste deduction Maletolte) qui signifie leuer, c'est à dire cueillir. exiger & receuoir, aussi vse on de ce mot leuer en cas de tailles & subsides, disant leuer la taille, Publica exigere, Ou bien, ce qui a plus de couleur, tous deux viennent de τέλοζ en signification de tribut, subside, & de ce mot Grec τελώτιον, qui signifie le contour ou le bureau des exacteurs & maletoltiers (comme dit Chrysostome) où les tributs, tailles, impositions & autres subsides sont portez, acquittez & serrez, Publicanorum mensa ac scrinium, quo tributa vectigaliáque referuntur, Comme si lon disoit par syncope de la lettre ω, Tellion (car la lettre n se trocque ordinairement en l, Bononia Boulongne) & par corruption du mot, Tollieu. Ceux qui aiment mieux l'extraire dudit verbe Latin Tollo, Le font par ce qu'en tels affaires on vse aussi de ce verbe Leuer, & de son opposite imposer, car on dit imposer tributs & subsides, &,;leuer la taille, les imposts & subsides, &,;faire vne grande leuée de deniers sur le peuple.