rurent inconsiderement ou estoit ce corps, qu’ils prindrent pour estre le mien, et les plus zélés s’estans jettés dessus, empescherent les plus considerés de le mieux reconnestre, et tous l’emporterent cheux moy. Aucuns des miens venus au devant, crians, avesques des flambeaux, on s’aperceut en fin que c’estoit un autre homme, et le rapporterent cheux un chirurgien voysin, ou la justice s’en vint tost apres saysir : ce quy causa un assés grand scandale et moqueríe de mes gens par la ville.
Peu de temps apres Mr le Prince s’alla marier a Chantilly[1]. Le roy revint de Fontainebleau a Paris, comme firent, tost apres les noces, ceux de Chantilly. Deux jours apres monsieur le connestable fut un peu malade, et je le vis : et puis il se fit un bal cheux la reine Margueritte, ou madame la nouvelle princesse parut ; j’y eus bien des embarras pour un habillement bleu que j’y portay.
Le lendemain le roy alla a Fontainebleau, et les princesses et dames aux Tuilleries, ou il y eut une excellente musique. Le lendemain elles partirent pour aller a Fontainebleau, et moy j’y allay en poste, et arrivay comme on faisoit mettre l’eau au grand canal : le roy gagea mille escus contre moy que dans deux jours il seroit remply, et il ne le fut pas en huit.
Mesdames les princesses demeurerent huit jours a la court, puis s’en allerent a Vallery[2] ; et deux jours
