Cette page a été validée par deux contributeurs.
33
v. 681—717
pincedés
Verse, Cliquet, si me fai boire !
Pour poi li levre ne me fent.
clikés
Be ! boi assés ! qui te deffent ?
Boi, de par Dieu ! Bon preu te fache !
pincedés
Diex ! quel vin ! Plus est frois que glache.
Boi, Cliquet ! Chi a bon couvent.
Li ostes ne set que il vent ;
A seize fust il hors anchois.
clikés
Santissiés pour le marc dou cois
Et pour son geugon qui la seme.
pincedés
Voire, et qui maint bignon li teme
Quant il trait le bai sans le marc.
caignés
Cliquet, foi que tu dois saint Marc,
Taisiés vous ent, n’en parlés mais !
[clikés]
Mais bevons en bien et en pais,
Nous avons encor vin el pot
De no premerain demi lot,
S’avons de le candoille ardant.