Cette page a été validée par deux contributeurs.
45
v. 896—930
Met jus les deniers, je t’en pri,
Ains que li casee m’esmoeve.
clikés
Maudehé ait qui che me roeve,
Puis c’on voit que seur les des vient !
pincedés
Enne dis jou che fu pour nient ?
Veus le tu avoir par effort ?
il saisit Cliquet au collet
clikés
Dyables ! Que chis me tient fort,
Pour poi qu’il n’esrache me cape !
pincedés
Tien de loier ceste soupape !
Je commenç, car mix de ti vail.
clikés
Et pour itant le te rebail :
Or pués veoir que je te dout !
caignés, au tavernier
Sire, sire, vous perdés tout.
Acourés tost, no wage empirent.
Car cist ribaut tout se descirent,
Et si n’ont drap qui gaires vaille !
li tavreniers
Qu’est che, Cliquet ? Est che bataille ?
