Por l’amor Charlemaigne sera il afolé ;
Mar li a en sa cort dite si grant vilté.
Li dus Bues d’Aigremont s’estoit levé en piés
Et escrie ses homes : « Baron, ne vos targies.
Prenes moi les mesages, chascuns soit destranchiés. »
Atant saillent si home, si ont les brans sachiés
Et acueillent roiaus, si les ont damagiés.
Et li [dus] d’Aigremont si s’estoit desbuchiés[1]
Et escrie ses gens : « Gardes, nes espargnies. »
Il ot l’auberc vestu, ses hiaumes fu laciés,
Vait ferir Enguerran vers cui s’est adreciés.
Entreci qu’en es dens n’est li brans atargiés.
Mor l’avoit abatu et cil est trebuchiés.
« Sainte Marie dame, dist Dreves, car aidies.
Mais ne verrai le roi de cui fui envoiés »
« Vasaus, ce dist li dus, point ne vos esmaies.
Tost et isnellement arriere repairies.
Le mesage enportes, ki ci gist depeciés.
Si dites à Charlon : tex li est envoiés ;
En liu de mon treü li soit par vos bailliés,
Que ja jor que je vive d’autre n’estra paiés.[2]
Et se je le puis faire, il estera iriés.
Ne li sera garans haubers, tant soit mailliés,
Que j’encor ne l’ocie, se j’en sui aaisiés. »
« Sire, ce a dit Dreves, vos iestes marvoiés.
Encor en iert tes regnes gastés et essilliés.
A mainte weve dame en iert li cuers iriés. »
Quant li dus d’Aigremont ot Enguerran ocis,
Dreves et Hermenfrois en ont les cuers maris ;
Durement le regretent et plorent à haus cris.
« Sainte Marie dame, dist Dreves li jantis,
Et que porrons nos dire Charlemaigne au fier vis ! »
D’Aigremont departirent, ainc n’i fu congies pris
Si enportent le cors par desus .ii. roncins,
Dolant et correcié se sunt d’iluec partis ;
