Orig. – Arch. municip. de Bordeaux. Envoi de M. le secrétaire général de la ville.
Messrs, J’ay receu vostre lettre et entendu par le sr de Lestonat[1] la charge qu’il avoit, vous remerciant de cest office de congratulation et de vostre bonne volonté dont il m’a rendu tesmoignage. Je vous prie aussy, Messrs, ne doubter point de la mienne, et croire qu’en tous endroits où j’auray moyen de faire quelque chose pour la conservation de vostre ville, et pour le soulagement des charges qu’elle supporte, je m’y employeray de bon cœur, et à vous faire à tous plaisir particulierement[2] Mais vous sçavés la necessité qui est de present és affaires du Roy mon seigneur, pour le service duquel vous n’avés jamais rien espargné. Je m’asseure aussi maintenant que vous vous esvertuerés de telle sorte qu’il en sera secouru comme il desire ; vous recommandant ce qui en despend et le debvoir de vos charges. A tant je prieray Dieu, Messrs, vous avoir en sa saincte et digne garde. Escript au camp de Nyeul pres la Rochelle, le xxive jour de mars 1573.
HENRY.
- ↑ « Jehan Denys Daulede, écuyer, seigneur de Lestonat, baron de Margaulx, seigneur du Cros, du Parc et autres lieux, conseiller du Roy en sa cour de parlement de Bordeaux. » (Biblioth. roy. cabinet généalogique, article Du Cros.)
- ↑ Ces relations entre la ville de Bordeaux et le roi de Navarre tenaient à son titre de gouverneur de Guienne.
