roles et en effects, en estresme diligence et vigilance, en doulceur envers ung chascun, en prompte justice, en ordre, en pacience à escouter chascun, en prudence de couveil, il monstre bien qu’il est faict de vostre main et appris de vous seul, car de nul aultre ne peut il estre disciple ; car de toutes les vertus que Dieu vous a données, il en a pris si bonne part, que vous trouverés en toute chose vostre voulenté suivie. Ce que je vous dis n’est point de moy seule, mais après avoir parlé à tous les capitaines l’ung après l’autre, de toutes les sortes et nacions que vous avés au camp, ils m’ont dit tout ce que je vous mande, et mille fois davantaige, luy portant une amour et une obéissance si grande, que encores entre eux n’y a eu nul débat, et sont ceulx qui de natures estoient contraires comme frères unis ensemble. Le comte Guillaume m’a dict que je vous escripve qu’il y a bien différence du purgatoire honteux d’Italie au paradis glorieux de ce camp, et m’a dict des faultes passées que j’ayme mieulx qu’il vous compte que moy, car ils sont importables, principalement voyant, Dieu
mercy, tout le contraire en cette armée, qui est telle que je ne voudroys pour tous les biens de ce monde ne l’avoir veue, car je l’estime tant, que je vous proumets ma foy, monseigneur, que sy l’Empereur feust venu quant je y estois, je n’en eusse point bougé, estant toute seure qu’il ne peult nuire à une telle compaignie. Au pis aller, je serois trop heureuse de mourir avecques tant de vertueuses personnes.
Guillaume de Fustember
