Amy lecteur, l’une des copies de ce discours m’estant tombée entre les mains, j’ay estimé que je serois très ingrat si je ne le faisois voir au jour, pour servir d’avertissement à ceux qui sont tellement abandonnez à leurs appetits charnels, et quy le plus souvent se laissent aller aux charmes et faintises de ces bestes envenimées, quy ne s’estudient, comme il paroist par ces salles et impudiques discours, que pour attraper ceux quy par trop aiment leurs salles et deshonnestes plaisirs, et quy le plus souvent, par le moyen de ces canailles, perdent le corps et l’ame. C’est pourquoy je m’en estonne si Aristote disoit que nature a faict les femmes plus belles et tendres que les hommes ; aussi les a-t-elle faict plus fines, cauteleuses et malicieuses. Cela occasionna Codrus à dire que le ciel ne contenoit tant d’estoiles, ne la mer tant de poissons, que la femme couvoit de fraude et de malice dans son ame pleine de curiosité et de desirs. Chiron disoit qu’il estoit meilleur d’ensevelir une femme que de l’espouser. La femme chaste, pudique et vertueuse, se fait bien cognoistre et respecter sans mot dire.
La fille de joye porte preuve de son deshonneur en ses gestes et en sa contenance, disoit l’ancien tragique Eschylian, dans Athènes.
C’est le propre de la femme de se laisser tromper, dit sainct Hierosme, et de tromper les autres. Aussi, si la première femme ne se fust mise du party du diable, le diable se desesperoit de venir à bout du premier homme. Il suit encore son premier train, dont il s’estoit bien trouvé. Tu es la porte du diable, disoit Tertulian à sa femme, etc. La première qui a
