qui virent les enormitez et les très granz desloiautez que il fesoient, il le firent savoir au roi Phelippe. Moult fu li rois esmeuz, quant il oï ceste chose, pour le despit de sainte Eglise et en grant compassion des gries que cil dou païs soufroient ; grant plenté de bone gent et de bien apareillié leur envoia en secors. Quant cil dou païs orent la force et l’aide le roi, il se ferirent d’un cuer et d’une volenté entre les desloiaus et les occistrent touz du plus petit jusques au plus grant. Leur despoilles pristrent, dont il furent enrichi. En tel maniere prist Diex venjance des desloiaus qui tiex cruautez et tiex desloiautez fesoient ou païs, et retornerent arriers en graciant et en loant Nostre Seigneur.
[1]Guerre et dissensions qui lonc tens avant estoit commenciée, fu renovelée entre le conte Raimon de Saint Gile et le roi d’Arragon[2], tele que nus ne pooit metre en iaus ne pais ne concorde ; si que les povres genz dou païs estoient forment grevé par leur guerres. Mais Nostre Sires, qui oï la clamor et la complainte de ses povres, leur envoia salvaor, non mie empereor ne roi, ne prince ne prelat, mais un povre home qui avoit non Durant, à cui Nostre Sires s’aparut en la cité
