vit que li jardim de Damas estoient pris et li fluns guaeniez par force, bien li fu avis que la citez ne se tendroit pas longuement. Lors vint à l’emperaor et au roi de France et au roi Baudoim et lor pria moult docement que il li donassent cele cité de Damas quant ele seroit conquise. Ce maimes requit-il aus barons de France et d’Alemagne, qui bien s’i acorderent, car il lor prometoit moult que bien la garderoit et loiaument et bien engueroiroit les enemis Nostre Segnor. Quant li barom de Surie l’oïrent dire, granz corrouz en orent et grant dedaign de ce que si hauz princes, qui tant avoit de terre en son païs et estoit là venuz purement en pelerinage, voloit ore guaenier en tel maniere un des plus riches membres dou roiaume de Surie. Miauz lor sembloit, se li rois Baudoins ne la retenit en son demaine, que li uns d’aus l’aut, car il sont toz jors en contenz et en plez aus Sarradins. Quant li autre barom retornent en lor paIs, il ne se muevent, car il n’ont riens ailors. Et por ce que il lor sembloit que cil vousit tolir le fruit de lor travaus, plus bel lor estoit que li Tur la tenissent encore qu’ele fut donée au conte de Flandres. Por ce destorber, s’accorderent à faire la traïsom.
Li autre disoient que li princes Raimonz d’Anthioche, qui trop estoit maliciex, puisque li rois de France se parti de lui, par mal ne fina de porchacier à som pooir comment ennuiz li venit et destorbiers de s’onor. Por ce, manda aus barons de Surie qui estoient si acointe et lor pria de cuer que il maisent tote la paine que il porroient à destorber le prou et l’onor le roi Loois, si que il ne fait chose qui honorable fut. Par sa priere, avoient-il ce porchacié.
