Li tiers didrent la chose si com vos oïstes prumierement, que par grant avoir que li Tur donerent aus barons, fu cele daloiautez faite.
Grant joie ot en la cité de Damas, quant nostre enemi en virent ensi aler si grant gent qui contre aus estoit asemblée. Encontre ce, toz li roiaumes de Jerusalem en fu corrouciez et desconfortez, et quant cil grant home furent retorné, si refu pris uns parlemenz où il asemblerent tuit li grant barom et li menor. Là fu dit, que bone chose seroit que il faissent un grant fait où Nostre Sires fut honorez et par que l’om parlat d’aus mais touz jors en bien. Ilueques fu amenteu[1] que la citez d’Escalone[2] estoit encores ou pooir des mescreanz, qui seoit ausi comme ou mileu dou regne, si que se l’an la voloit asoir, de totes parz porroient venir viandes seurement en l’ost, par quoi il seroit legiere chose de conquerre la ville qui longuement ne se porroit tenir contre si grant gent. Asez fu parlé entre aus de ceste chose ; mais n’an fu riens acordé por ce que il i avoit destorbeors qui mieuz s’en voloient retorner en lor terres que asoir citez en Surie. Si n’estoit mie de mervele se li estrange pelerim de France et d’Alemaigne avoient le talent perdu de bien faire en la terre, quant il veoient cex dou païs maimes qui Dieu et ex maimes avoient traïz et le comun profit destorbé et empehechié, si com il parut devant Damas. Il sembloit que Nostre Sires ne vousit riens faire de sa besoigne par ces genz. Ensi se departi li parlemenz que nule riens n’i ot empris.
