Contes populaires d’Afrique (Basset)/165
165
COMPAIR LAPIN ET MICHIÉ DINDE[1]
ous les soi, quand Compair Lapin té révini so louvrage, li té traversé ein lacou ou yé
té gaignin ein gros dinde qui tapé dromi
ou so perchoir, et comme tous lé zotte dinde cila
té mette aussite so latéte en bas so zaile pour
couri dromi.
Tous les soi Compair Lapin té rété gardé dinde la, et li té mandé li même ça li té fait avec so latéte. Enfin ein soi li té si quirié li rété en bas perchoir la et li dit :
— Bonsoi, Michié Dinde.
— Bonsoi, dit Dinde la sans levé so latéte.
— Est-ce qui vous gaignin ein latéte, Michié Dinde ?
— Oui, mo gaignin ein latéte.
— Ou liyè ?
— Mo latéte la.
Compair Lapin té beau chercher, li té pas oua latéte Michié Dinde.
Com li oua Dinde la té pas oulé causé avec li ni montré la ou li mette so latéte, li couri chez li et dit so sère :
— Est-ce que to connin que pou couri coucher oté yé latéte ? Eh ben, mo cré malle fait même quichoge, pasqué c’est moins tracas dromi sans latéte, et moune capabe parlé sans latéte, pasqué dinde la parlé avec moin.
Avant so sère té gaignin temps dili arien, li prend ein lahache, et li coupé so latéte. So sère sayé tout quichoge pour coller latéte so frère, mais li té pas capabe, pas que li té tchué li mène.
- ↑ Alcée Fortier, Louisiane Folk-tales, Boston, Houghton Mifflin et Cie, 1895, in-8, p. 24.