LIVRE 2 CHAPITRE 12 | ◄ | De la sagesse | ► | LIVRE 3 CHAPITRE 1 |
DE
LA SAGESSE
LIVRE TROISIÈME
LIVRE 3 PRAEFACE
Auquel sont traictez les advis particuliers
de sagesse par les quatre
vertus morales.
Puisque nostre dessein en ce livre est d’instruire
par le menu à la sagesse, et en donner
les advis particuliers après les generaux touchez
au livre precedent, pour y tenir un train
et un ordre certain, nous avons pensé que ne
pouvons mieux faire que de suyvre les quatre
vertus maistresses et morales ; prudence, justice,
force et temperance : car en ces quatre
presque tous les debvoirs de la vie sont comprins.
La prudence est comme une generalle
guide et conduicte des autres vertus et de
toute la vie, bien que proprement elle s’exerce
aux affaires. La justice regarde les personnes ;
car c’est rendre à chascun ce qui luy appartient.
La force et temperance regardent
tous accidens
bons et mauvais, joyeux et fascheux,
la bonne et mauvaise fortune. Or en
ces trois, personnes, affaires, et accidens,
est comprinse toute la vie et condition humaine
et le trafic de ce monde.