Iconologie (Cesare Ripa, 1643)/I/Meſure

La bibliothèque libre.


Mesvre. XCIX.


CEtte Femme ingenieuſe ne ſe fait pas moins remarquer par ſon habillement modeſte, que par ſa bonne mine. Elle a en ſa main droite la meſure du pied Romain : en la gauche l’Eſquerre & le Compas, ſous les pieds le Carré Geometrique ; & à coſté de ſa robe le Niueau, auecque ſon plomb.

Par le mot de Meſure, ſelon Iſidore, ſe doit entendre tout Lib. de Geſt. Re. c. 3 ce que l’eſtenduë, la longueur, la hauteur, & l’eſprit limitent. Pluſieurs Autheurs, dit Polidore Virgile, l’ont inuentée en diuers païs : Car il ſe void dans Eutrope, Qu’vn certain Sidonius fut inuenteur des meſures & des poids, au temps que Procax regnoit en Albanie, Aza en Iudée, & Ieroboam en Ieruſalem. Ce qui s’entend neantmoins des choſes liquides & menuës : Mais comme les opinions ſont differentes, Gellius en attribuë l’inuention à Palamede, & Pline à Fidon Argien, qui fut le dixieſme Roy des Eliens, en ſuitte du grand Hercule, qui ſurpaſſa tous les autres Princes de ſon temps : ce qui a donné lieu, ſi ie ne me trompe, à la meſure Fidonienne, qui eſtoit faite d’eſtain, de fer, & de ſemblable matiere, que le marteau pouuoit rendre ſouple.

Mais pource que les outils repreſentez en cette figure, ſont ceux dont on vſe à meſurer la terre, c’eſt dequoy nous parlerons particulierement. Il faut donc ſçauoir, Que le premier Lib. 2 qui s’en ſeruit à la partager, fut vn certain Egyptien, qu’Herodote nomme Soſoſtre Roy d’Egypte. Celuy-cy ayant diſtribué à chacun de ſes vaſſaux vne égale portion de terre, les mit tous à la taille, dont l’impoſition fut annuelle. Que s’il arriuoit de fortune, que quelqu’vn d’entr’eux eut ſouffert du degaſt en ſes terres par vn deſbordement d’eau, il luy faiſoit rabattre de la ſomme à laquelle il eſtoit taxé, à l’égal de la perte qu’il ſe trouuoit auoir faite. Ainſi la connoiſſance de la Geometrie vint premierement d’Egypte, d’où elle paſſa depuis en In Enc. Geom. Grece : ce qui fait dire à Cardan, Que Tales le Mileſien en traça les premieres lignes dans Athenes. Voila ce que diſent les Autheurs, quand ils parlent de cét Art. Ils ne conſiderent pas neantmoins, que l’origine en eſt incomparablemnet plus ancienne Lib. 1. Ant. c. 2 qu’ils ne la font : car, ſelon Ioſephe, Caïn premier enfant d’Eue, diuiſa la terre, à laquelle il mit des bornes, & baſtit Geneſ. 4. la ville d’Enoch, dont il eſt parlé dans l’Eſcriture : ce qu’il n’euſt pû faire apparemment, ſans aucunes meſures, ny ſans auoir connoiſſance de la Geometrie.

Or de tous les inſtrumens que nous eſtalons en cette Figure, il n’y en a pas vn qui ne ſoit pris des anciennes inſcriptions. Le premier eſt le pied Romain, d’où ſont tirées les principales meſures, comme l’Aulne, l’Orgie, la Perche Geometrique, & ainſi des autres, dont il eſt parlé au long dans les eſcrits du Demenſ. in Plin. l. 35. c. 14 docte Budée, d’Habaldus, d’Ermolaüs Barbarus, & de leurs ſemblables.

La Meſure appellée Decempeda, pource qu’elle eſtoit longue de dix pieds, ſeruoit generalement à tous les Architectes & Arpenteurs, pour prendre les dimenſions des baſtimens qu’ils auoient à faire ; Mais les gens de guerre en vſoient particulierement, quand il leur falloit camper, ſoit qu’il fuſt queſtion, ou de meſurer le terrain, ou de tracer la largeur d’vn foſſé, ou de faire les plans, ou de regler les lieux propres à dreſſer des tentes. Ils auoient pour cét effet des Arpenteurs & des Fourriers, qui marchoient deuant la ſoldateſque, & qui marquoient ponctuellement les logemens en châque quartier du camp, comme font encore auiourd’huy les Mareſchaux des logis. Lib. 2. cap. 7. Dec. 4. lib. 5. Lib. I. cap. 10. Lib. 24. cap. 16. Ce que ie pourrois deduire plus au long, ſi les preuues n’en eſtoient euidentes dans les Liures de Vegece, de Tite-Liue, de Caſſiodore, de Turnebe, & de pluſieurs autres.

Pour ce qui eſt du Niueau, parmy pluſieurs inſcriptions il s’en void vne de Cneus Coſutius, où cét inſtrument eſt marqué en forme d’vn A capital, auec ſon plomb attaché à vne ficelle, qui tombe au milieu en forme de ligne droite. Cét inſtrument de Geometrie eſtoit aux Anciens vn ſymbole de Iuſtice, & nous-meſmes en vſons encore, pour monſtrer qu’il ne faut pas ſeulement eſtre iuſte en la meſure des baſtimens, mais qu’à parler myſtiquement, les hommes ſont obligez d’obſeruer exactement cette égalité en toutes les affaires qu’ils ont à demeſler enſemble. Pour cette meſme fin par la Loy de Lib. 12. tit. 6. l’Empereur Gratian, enregiſtrée dans le Code de Theodoſe, l’on s’eſt aduiſé de donner au public des meſures & des poids, afin que chacun ſçache ſon compte, & que s’il eſt poſſible, il ne ſe commette aucune fraude. Auſſi ſainct Thomas les eſtimoit neceſſaires à la conſeruation des Eſtats, & à la fidelité qui ſe doit garder dans le commerce. De là vient que dans le In Princip. c. I.]] Leuitique, où Dieu commande à Moyſe d’exhorter ſon peuple à maintenir l’Equité. Il luy propoſe les regles de la Iuſtice naturelle, par ces paroles, Vous ne ferez, rien de frauduleux Cap. 19. en vos Iugemens, en vos regles, en vos poids, ny en vos meſures, etc.

De cette Meſure materielle, nous pouuons paſſer maintenant à la morale, & dire à bon droit, Qu’il n’eſt point de plus belle eſtude, que celle de la moderation de ſoy-meſme, puiſque ſelon Hesiode,

Il n’eſt rien de ſi beau qu’vne égale iuſteſſe.

A quoy par maniere de ſymbole nous pouuons fort bien appliquer les inſtrumenſ de Geometrie, principalement le pied, dont il eſt dit dans Horace : Epiſt. 7. lib. 1

Qu’il eſt bon que chacun à ſon pied ſe meſure.

Et pareillement la Perche, qui ſeruant à meſurer nos terres, nos poſſeſſions, & nos meſtairies, qui nous fourniſſent dequoy viure ; nous apprend par Metaphore à meſurer noſtre bien par nos rentes, & a ſuiure cét aduis d’Horace, Horat. li. 2. Sat. 3

Selon ton reuenu modere ta deſpenſe.

Cela nous encore demonſtré par le Niueau, qui eſt vne figure myſtique de la Iuſtice & de l’égalité, qu’il faut que nous obſeruions icy bas. Et comme par le moyen du plomb, eſt priſe la dimenſion de la hauteur, nous deuons de meſme meſurer celle de nos penſées auecque prudence & iugement ; puiſque, comme dit Seneque, In Oedip.

L’ouurage que l’on fait ſans poids & ſans meſure
____N’eſt pas choſe qui dure.

Et que l’experience nous monſtre, Martial.

Qu’il faut touſiours auoir pour les charges peſantes,
____Des forces ſuffiſantes.