Iconologie (Cesare Ripa, 1643)/II/Amitié
L’amitié.
A vraye Amitié, qui ne ſe propoſe pour but
que d’aider le Prochain, eſt repreſentée par les
trois Graces. Ces Vierges, dont le viſage eſt ſerain,
ſont toutes nuës, & ont les bras enlacez.
La premiere tient vne Roſe à la main, la ſeconde
vn Dé, & la troiſieſme vn Bouquet de Myrthe, pour monſtrer
les trois differens effects de cette Vertu, qui ſont, de donner,
de receuoir, & de rendre le ſemblable. Leur Virginité nous apprend,
que la ſincere Amitié ne veut eſtre ſoüillée d’aucune
tache ; Leur nudité, qu’il ne faut pas qu’il y ait ny fard ny déguiſement entre les Amis ; Et leur viſage riant, qu’on ne doit iamais pareſtre triſte, ſoit que l’on oblige par quelque bienfait,
ſoit qu’on le reçoiue. I’adjouſte à cecy, que par la Roſe
nous eſt ſignifiée la complaiſance qu’il y doit auoir entre ceux
qui s’ayment ; par le Dé, leur reconnoiſſance, qui doit paſſer
de l’vn à l’autre ; & par le Myrthe, leur vnion incorruptible.