Iconologie (Cesare Ripa, 1643)/II/L’aage d’or

Cesare Ripa

Iconologie où les principales choses qui peuvent tomber dans la pensée touchant les Vices et les Vertus sont représentées sous diverses figures

Traduction par Jean Baudoin.
1643 (p. 40-43).

L’aage d’or.

IL eſt repreſenté par vne belle Fille, couronnée d’vne guirlande de fleurs, veſtuë d’vn ſimple habillement, & qui tient de la main gauche vne ruche de mouſches à miel, & de la droite vn rameau d’oliuier.

Par ſa guirlande & ſon habillement ſimple, eſt denotée la pureté de ce temps-là, où toutes choſes eſtoient ſans artifice.

Par la ruche de mouſches à miel, la vie douce que menoient alors les creatures viuantes, & par l’oliuier, la merueilleuſe tranquillité qui regnoit au monde ; d’où les ſeditions & les guerres eſtoient tout à fait bannies. Car, comme le remarque apres les Anciens le plus poly de nos Poëtes, M. de Malherbe.

La terre en tous endroits produiſoit toutes choſes,
Tous metaux eſtoient Or, toutes fleurs eſtoient Roſes,
         Tous arbres Oliuiers :
L’on n’auoit plus d’Hyuer, le iour n’auoit plus d’ombre,
         Et les Perles ſans nombre
Germoient deſſous les Eaux au milieu des grauiers.