Iconologie (Cesare Ripa, 1643)/II/La Nuict
La nvict.
’Eſt fort à propos qu’on la dépeint ſous l’Image de
Proſerpine, Reyne des Enfers. Les Pauots dont elle
eſt couronnée monſtrent qu’elle eſt mere du Sommeil.
Ce qui procede de ce que par ſon humidité
elle accroiſt les vapeurs de l’eſtomach, qui s’eſleuent en la plus
haute partie du corps ; & qui redoublant leur froideur par celle
du cerueau, deſcendent plus bas ; & nous font dormis, à
quoy, ſelon Ariſtote, les tenebres contribuent extremement.
Où il eſt à remarquer que les Poëtes nomment encore la Nuict
la douce nourrice du Sommeil, pource qu’elle ne l’engendre
pas ſeulement, mais qu’elle l’entretient en effet & le nourrit.
Quant au Tridẽt & à la torche allumée qu’on luy fait porter en
la main ; c’eſt pour monſtrer l’empire qu’elle a ſur les tenebres ;
à trauers leſquelles il eſt impoſſible d’agir, ſi elles ne ſont diſſipées par la clarté, A raiſon dequoy quelques-vns tirent l’ethymologie de Nox du verbe Latin Nocere, pour monſtrer que la
Nuict eſt aſſeurément nuiſible aux yeux, en ce qu’elle les priue
de l’acte de voir, en leur cachant les couleurs des choſes
auſquelles l’œil ſe plaiſt naturellement.