Iconologie (Cesare Ripa, 1643)/II/Mathematique
Mathematiqve.
Ette Dame dont le maintien eſt ſerieux & graue,
fait conceuoir d’abord à ceux qui la voyent qu’elle
repreſente la Mathematique. Elle a vne robe tranſparente,
les cheueux treſſez eſpars ſur ſes eſpaules ;
vn compas en la main droite dont elle trace diuerſes figures,
en la gauche vne maniere de Sphere, & ſous ſes pieds qui ſont
nuds, vne baſe ſur qui elle ſe ſouſtient.
Par ſon habillement tranſparent il nous eſt enſeigné que ſes demonſtrations ſont ſi claires qu’on ne les peut contredire ; Par les aiſles de ſa teſte, que par la force de ſon eſprit elle s’eſleue à la contemplation des choſes celeſtes ; Par ſon viſage graue, qu’il n’y a rien que de ſerieux en ſa doctrine, qui luy fait dedaigner les choſes vulgaires ; Et par ſes cheueux eſpars, qu’en ſes maximes, qui s’eſtendent au large, elle n’a rien de contraint ny d’affetté.
Le Compas dont elle trace diuerſes Figures, ſans y comprendre celles dont le bord de ſa robe eſt ſemé, ſignifie qu’elle n’agit point à la volée, mais auecque iuſteſſe, comme s’appuyant ſur des fondemens & ſur des principes infaillibles.
Le Globe quelle tient d’vne main, comprenant le cercle du Ciel, & vne deſcription de la terre, fait voir que nous n’aurions aucune connoiſſance certaine des dimenſions de l’vn ny de l’autre, ſi elles ne ſe fondoient ſur les raiſons de Mathematique.
A tout ce que ie viens de dire il faut adiouſter, qu’elle taſche de faire conceuoir ſes demonſtrations à vn enfant, pour nous donner à entendre que dés cet aage-là nous ſommes propres à les imprimer dans noſtre memoire, à cauſe de leur merueilleuſe euidence, qui ſe ſouſtient d’elle meſme, comme il nous eſt figuré par la nudité de ſes pieds, qui s’appuyent ſur vne forte baſe.