Iconologie (Cesare Ripa, 1643)/II/Le Sanguin
Le Sangvin.
E jeune Garçon qui nous le repreſente, a les cheueux
blonds, le viſage replet, & le teint meſlé de blanc &
de rouge. Il paſſe ſon temps à joüer du Luth ; Et du
coſté de cette Figure ſe void vn Mouton qui broute
vne grappe de raiſin, & de l’autre vn Liure de Muſique ouuert.
Le Sanguin eſt peint auec vn viſage riant, dautant que ſelon Hypocrate, il arriue d’ordinaire qu’en ceux qui abondent d’vn ſens parfaitement temperé, s’engendrent des eſprits vitaux, ſubtils & purs, qui produiſent la joye & les ris. D’où il s’enſuit que telles perſonnes ſont ordinairement de belle humeur, & qu’elles ne demandent qu’à joüer & à ſe diuertir.
Lib. 2 de temp. c 9. Son embompoint, ſelon Galien, ſignifie, que de la vertu qu’on appelle aſſimulatiue, qui predomine aux Sanguins, naiſt l’habitude des corps charnus & replets.
On luy attribuë le teint vermeil meſlé de blanc, dautant que ſelon Auicenne, cette couleur marque vne abondance de ſang. Aphoriſ. 2. comment. 1. Ce qui fait dire à Galien, que l’humeur qui predomine au corps colore la chair.
Quant au Mouton qui broute vne grappe de raiſin, cela ſignifie que le Sanguin eſt grandement adonné au plaiſir de Venus & de Bacchus ; pource que le Mouton, comme le remarque Lib. 107. Pierius Valerian, eſt grandement enclin à la luxure, & qu’icy le raiſin eſt pris pour Bacchus qui le produit. Où il faut remarquer auec Ariſtote, que ceux de complexion ſanguine ſont particulierement enclins à l’amour, à cauſe qu’ils abondent en ſemence plus que les autres ; comme il ſe peut voir par la deſcription qu’en fait l’Eſcole de Salerne.