Iconologie (Cesare Ripa, 1643)/II/Le Septentrion

Ajouter des liens
À formater
La bibliothèque libre.


Le Septentrion.


SA Figure eſt celle d’vn homme d’aage robuſte & viril, qui a la taille belle, les yeux bleus & eſtincellans, & les cheueux blonds : il eſt couuert d’Armes blanches, en action de mettre la main à l’Eſpée, & porte vne Eſcharpe de bleu Turquin, où ſe voyent trois Signes Septentrionaux du Zodiaque, qui ſont le Cancer, le Scorpion, & les Poiſſons. Il a le viſage tourné vers le Ciel qui eſt tout couuert de Frimas, & regarde tout à meſme temps les deux Ourſes.

Son viſage eſt viril, pour la raiſon que nous auons alleguée dans la Figure de l’Orient.

Il a le regard affreux, la taille forte, & le teint ſanguin ; qualitez qui luy viennent du climat froid, dont les hommes ont l’eſthomac meilleur que les autres, & digerent mieux les viandes : comme au contraire ceux qui naiſſent au Midy, ont la taille petite, & le teint noir. Outre qu’ils ne ſont pas ſi ſanguins ny ſi groſſiers, & qui excellent en l’art de tromper.

Il eſt couuert d’Armes blanches, & en action de tirer l’Eſpée hors du fourreau ; pour donner à connoiſtre le naturel indomptable, & la fierté de courage des peuples Septentrionaux. Car en effet l’experience a fait voir à la pluſpart du monde, & particulierement à l’Italie, qu’ils ont touſiours eſté fort aguerris. Or ce qu’ils ont ainſi l’humeur fougueuſe, & portée aux Armes, & d’vn excés de colere qui s’allume en eux pour la moindre choſe. Auſſi ſont-ils, comme dit Petrarque,

Ennemis de la Paix, quand vne folle enuie
Les porte à ſe vanger aux deſpens de leur vie.

Il porte vne Eſcharpe de bleu Turquin, auec les figures du Cancer, du Scorpion, & des Poiſſons : pource que, ſelon les Aſtrologues, ces trois Signes ſont Septentrionaux.

Son viſage eſt tourné du coſté du Ciel, où il regarde en meſme temps la grande & la petite Ourſe, à cauſe que ces Eſtoiles fixes au Septentrion ne ſe couchent iamais, eſtant, comme dit Petrarque,

Viſibles en tout tems & deſſus noſtre Pole.

Quant aux Nuages & aux Frimas dont le Ciel eft chargé,

& du coſté defquels ce Guerrier tourne ſa veuë, cela ſe rapporte à ce que dit le meſme Petrarque parlant des Pays Septentrionnaux,

Que l’on peut appeller vn Climat ſans pareil
        Eſloigné du Soleil.
Où ſont de toutes parts les glaces eſtenduës,
        Et les neiges fonduës.

Récupérée de « https://fr.wikisource.org/w/index.php?title=Iconologie_(Cesare_Ripa,_1643)/II/Le_Septentrion&oldid=9630601 »