◄ Laisse DCXXXVIII | Laisse DCXXXIX | Laisse DCXL ► |
« Cil jor de l’apostoille et d’Orvi me sevrai
« E pris la penitançe teil cun je te dirai.
« En mi lou d’une stree tot nus me despoulai,
« Ma cote e mon sorcot a un pobre donai,
« Pués m’enclinai a tere, a Deu me comandai,
« A guise d’animaus con piez e mans alai,
« A l’ensir d’un chemin, en un desert m’alai,
« La menjuoie erbes e flor, non pais de glai,
« Aigue torble bevoie, e si me porpensai
« Qe je iroie a Sant Jaqes, et ou chemin intrai
« E tot a cele guise qe je encomençai.
« Quant je fu en Espagne, le qemin arajai ;
« Por divine pusance en cist leu arivai,
« Un prest hermite i avoit, qe de pur cors verai
« Servot Nostre Segnor, et a lui me tornai :
« Tot mes pechiés i dis e ma coupe clamai.
« Il ala en la capelle dou ber saint Nicolai,
« Iluech trova un angle, qe de voire le sai,
« Tot coloriz torna, liés e joians e gai,
« E me respondi chouse dont je m’acontentai.
« De cil jor en avant avech lu demorai. »