Le Disciple de Pantagruel/1875/09
D’ung pays où la terre est si fertile qu’elle produict par chascun an plus de mille moulins à vent, ensemble les musniers et les asnes tous propices pour porter la farine.
CHAPITRE IX.
Il advint du depuis, à cause de la mort dudict Bringuenarilles, ung aultre cas si merveilleux que je ne ose rescrire la vérité, de peur que vous ne disiez que je mens, combien qu’il soit vray. C’est qu’au lieu où ledict Bringuenarilles mourut et qu’il fut bruslé, la gresse pénétra si avant en la terre qu’elle entra et parvint jusques aux enfers, en sorte qu’elle brusia les espaulles de Lucifer, à cause qu’il estoit enchesné au fons d’enfer et qu’il ne s’en pouvoit fuyr. Au regard de ses disciples, ilz se saulverent ilz peurent, mais non pas sans estre fort intéressez en leurs personnes. La terre où le cas advint demeura si grasse et si fertile qu’elle produit par chascun an plus de mille moulins à vent, avecq les musniers et les asnes tous propres à servir ausdictz moulins. Les gentilz homnries du pays en. vont achapter ce pendant qu’ilz sont encores petitz, devant qu’ilz soient venuz en maturité et à perfection, et les font mener en leurs terres et seigneuries sur des brouettes, puis les font planter, et, lorsqu’ils sont desja grandz et parcruz, il ne leur fault que tourner les æsles vers le vent, et lors ils meulent et tornent comme ceulx de par deçà. Le seigneur à qui est la terre où ilz croissent en reçoit par chascun an ung merveilleux argent de ceulx qui les vont achapter : car l’on en meine par mer et par terre ung nombre infiny.