Le Roman du Renart - D. M. Méon — 1826/71
Si que li Rois Nobles arriva à Passe-Orguel ù Renart estoit.
Cascuns sailli qui miex miex huers,
Car hardement lor croist es cuers
Por çou c’à tiere sont hors mer.
Lors fist ses grans trompes souner
Li Rois pour se gent esbaudir,
C’à Passe-Orguel les puet oïr
Renart. Et sitost k’il les ot,
Dist, li Rois vient, au premier mot :
Or tost courez vous tost armer,
Deffendre li voel l’arriver.
Renart ist lors contre le Roi
De Passe-Orguel, par grant desroi
Baniere desploie au vent,
Ki dorée est très ricement
D’un or c’on nomme iniquité.
Apriès Renart sont arrouté
Trestuit li autre et Orgillous
Ki moult estoit fel et estous.
Cius fu moult ricement armés,
Et sour un grant destrier montés ;
Devant tous les autres se mist
Plus lonc que nus ars ne traisist,
Et crie en haut, tout serés mort ;
Quant li Lins ki cler voit, destort
Un pignonciel que il avoit
En son une lance, et estoit
De tel drap dont li sigles fu ;
D’umelité ot son escu
Couviert, et cotiele à armer.
Ce fist Orgilleus retourner
Dusques as siens, et dist ensi,
Poi avons gent, alons de chi,
Car tout sunt fors sor le sablon ;
Li Rois et od lui si baron
Moult bien armé sour les destriers,
Voiiés com grans est li pourriers.
Je vi Tardiu li limeçon
Tenir le roial gonfanon,
Et vi lés lui un chevalier
Séir sour un ferrant destrier.
Cius se maintient très simplement,
Mais il me het trop durement
Et jou lui, mais il voit si cler,
C’à bataille ne puis durer
Contre lui, trop set d’escremie ;
Bien se gaite et trop miex s’aïe,
Por ses armes d’umelité
M’a awan maintes fois maté.
Quant Renart l’ot ensi parler,
De hides conmence à tranler.
Sa gent conmande à retorner
A Passe-Orguel et ens entrer.
Ens entrent, fremer fist le porte,
Ki biele ert et séure et forte,
Et Rois Nobles ne se targa,
Ses tentes tendre conmanda,
Et cascuns les soies tendist :
Ensi fu fait conme il le dist.
As tentes vont tuit reposer,
Car travillié sunt de le mer.
Entour son ost fist li Rois faire
Fossés parfons jusqu’à deus paire,
Et i fist faire quatre entrées
De barbacanes bien fremées :
A cascune mist de ses gens
Pour bien garder dusqu’à deus cens.
Par le païs forriers envoie,
Ardent vilains et prendent proie :
En poi d’eure ont si net préé,
K’el païs a poi demouré.
La nouviele à Renart en nonce
Dame Outrecuidie li once,
Ki lés Passe-Orguel tiere avoit
K’en fief de Cerastre tenoit,
Ke li fourier orent reubée.
Apriès revint de randounée
A Renart Estoute li martre,
Et dist se ne soit mise en cartre
K’en se tiere sont li fourier,
N’i laissent ki vaille un denier :
Ci à vous m’en sui aficie
Savoir s’avoir porai aïe,
Sire, de vos gens ne de vous.
Dont respondi Renart li rous :
Oïl, foi que doi Saint Ghillain,
Sour les fouriers, irai demain ;
Mais or me dites, Dame Estoute,
S’il i a de fouriers grant route,
Ki les conduit et qui les maine,
De qui ont fait lor capitaine,
Ne ciévetaine de lor gent,
Quant enpris ont tel hardement.
Sire, dist-ele, jà l’orés :
Leoniaus un des fius mains-nés
Le Roi, cius les guie caiiele ;
Sire, le vaillant d’une astiele
Ne m’ont laissié, bien sunt set cent,
Nus ne vit mais si fiere gent ;
Venjance d’iaus vous requier, sire.
Renart pris lors errant à dire,
Coisiés vous, vengié en serés,
Et toute vo perte r’arés :
Car par Saint Piat de Seclin
G’i envoierai de matin
Quatre mil chevaliers armés,
De mon ostel les mius vantés,
Ses guieront mi fil andoi,
Cascuns vaut endroit lui un roi.
Ses fius erramment apiela,
Ceste cose lor conmanda.
Cil li demandent quel part sunt
Li fourier, et Renart respont :
Il sont el val oriental,
Tout le païs tournent à mal,
Estout castiel m’ont abatu,
Et tout le païs mis en fu.
Le fil le Roi vis m’amenés
Et tous les autres ociés.
Cil li otrient. Le matin
Se sont mis ensamble au cemin,
N’ariestent, si vienent où val
Que Renart dist oriental,
Sel’ voient tout ars et robé,
Et Estout castiel cravanté.
Li païsant erent où bos
Fui de péurs, mais ausitos
K’il parçurent les fius Renart,
Sont ensanle trait cele part,
A aus se plaignent des roiaus,
Et il s’escrient, ore à eaus ;
U sunt, ù les porons trouver ?
Signour, jà les verés monter
Cele grant roce et ça venir,
C’au jour d’ui doivent assalir
Tort-Castiel et le proie prendre,
Se n’est ki lor viegne deffendre.
Et li fil Renart disent lors,
Cascuns soit hui preudom dou cors ;
Mais une cose vos loons,
Se le loés, que nous faisons
En cest bos quatre enbuscemens,
En cascun ait mil de nos gens.
Sitost k’il seront descendu,
Lors n’i ait plus regne tenu,
Sour eaus irons de plains eslais,
D’eaus sera tantost faite pais ;
C’est c’ocis seront et tué :
Ce conseil ont trestot loé.
Lors s’enbuissent en le foriest,
Et li fourier sans nul arriest
Descendent de le roce aval ;
Ne sevent conme il lor va mal,
Ne des agais ki sont basti,
Fors tant que Lioniaus coisi
K’ens el bos ot enbuscement,
Reluire i voit or et argent,
Inde et gaune, vert et vermeil
Par le grant clarté dou soleil.
Ne s’en esmaie tant ne quant,
Mais se gent va amonestant
De bien faire, et lor dist ensi :
Ens el bos sunt agait basti,
Au jour d’ui arons le bataille,
Roial sommes, au jour d’ui vaille
Cascuns un roi : se nous finons
Conme preu, od Dieu Roi serons.
Gent somes au gentil Roi Noble,
Bien doit cascuns avoir cuer noble
Et fier contre ses anemis.
Mirons-nous où vrai Crucefis,
C’est où Fil Dieu ki fu en crois
Au grant jour de la mort destrois
Por nous, pour lui devons morir,
Puis que il le violt consentir.
Face de nous se volenté
Li dous Sires plains de pité,
K’en le Crois a ses bras tendus
Por nous prendre et porter lassus
En Paradis conme ses fius.
Frere somes, nos pere est Dieus,
Amans le si qu’il nous ama,
Cascuns à lui rendre l’ame a,
Dont je lot cascuns soit confiès,
Tant venromes de lui plus priès.
L’un à l’autre sunt confiessé
De devot cuer, puis ont crié
Merci à Dieu et à sa Mere,
Entrebaisié sunt conme frere.
Lors a fait Lioniaus tentir
Les trompes por eaus esbaudir :
A bataille les fist rengier,
Et ses banieres desploiier.
Ensi tout rengié de bataille
Atendent que on les assaille :
Estroit sont rengié et sieré,
Cascuns a cuer de Macabé,
Et s’aficent que ne fuiront
Tant qu’il doi ensanle seront ;
Mieus aiment morir à hounor
Ke vivre au monde à deshonor,
Et çou k’il ont droit et cil tort,
Par çou doutent si poi le mort
Ke en lor droit si grant foi ont,
Se il muerent, que Dieu aront.
Par çou se laissierent ocire
Li bon Saint et metre à martire
Li Apostle et li Saint Martir,
Or en ont-il Dieu tout entir.
Dont n’iert nule religions
Ke plus en est, mains foi avons,
Une nos dient, autre font,
Couvoitise eus et nous confont.
Couvoitise les fait tant fades,
Il ne siervent mais fors de blades,
Courre laissent bille et baston,
Les rices au jour d’ui blange-on,
Houneure et les caperons oste,
Par quoi il ont orguel à oste,
Et li povre sunt despité,
Ce ne vient pas d’umelité.
Tout somes d’Adan et d’Evain
Fait de no Pere souverain
Dieu : ne sai nus ait avantage.
Au naistre autant a de malage
Li mere au Roi conme autre Dame.
Ceste raisons orguel moult blame,
Et d’autel matere est estrais
Li rois c’uns autres, n’est fort brais.
De li ne de nous n’est fors fiens,
Li glore dou monde c’est niens :
Car li mors prent tout à son kius,
Sitost les jouenes com les vius,
Les haus ausi tost com les bas,
D’or les desviest et viest de sas.
Se bien faire ne les reviest,
Jamais ne fauront au tempiest
D’infier, ains seront tempesté
S’en cest siecle n’ont bien ouvré,
U s’à la mort n’ont repentance.
Mors set moult bien geter se cance ;
Ele set au gieu avantage,
Ki n’i pense, il i a damage.
Clerc et prestre, veske, prelat,
Diaules vous dist eskiec et mat
Dou fin de larghe consience,
Où point d’estroite passience,
En l’angle d’orguel ke Dieus het,
Si conme cascuns de nous set ;
Sour l’eskiekier de couvoitise,
Enviaus vous fait d’avarise,
Et renvie d’escarseté.
Pour çou a-il tant fauseté
Où monde et tant de renardie,
Cascuns est, mais Diu, foi-mentie.
Laissiés le gieu ; s’el giu finés,
Je di de double mort morrés.
Laissiés et enviaus et giu,
U vous serés maudit de Dieu :
Car tu pués prendre cascun jour
El siervice nostre Signour
Raison et exemple et matere
Dont estre pués Satan matere,
Par quoi pooir n’ara à ti.
Clerc, prestre, or entendés à mi :
Tout li viestement ont mistere
En quoi vous servés Dieu le Pere,
Se de fin cuer i regardés,
Satan as eschiés materés.
Li Papes et li Cardounal
De lor vermaus capiaus font mal,
S’il n’en tienent l’estruiement,
Sour iaus gietera jugement
Dieus, par Saint Piere et par Saint Pol,
Cascuns ot le cief et le col
Par martire de sanc vermeil ;
Cist doi Cardounal sans pareil
Amerent miex à estre ocis,
Ke li peules Dieu fust peris.
Cascuns de ces fu Cardinaus,
A droit orent capiaus vermaus,
Miex que n’ont cil Cardounal d’ore,
Car couvoitise les acore.
Or revenrons au fil le Roi
Ki se gent ot mise en conroi
Tout ensi con pour assanler ;
Cois les tint et sans remuer
Con cil ki moult a hardement.
Lors ist de son enbuisement
Percehaie od mil chevaliers,
Cius ala assanler premiers.
De jouster ert aigres et caus,
Dont ert de tiere li solaus
Departis, et sour miedi
Aloit quant li estours feni.
Jouster encontre Percehaie
Vint Leoniaus et tel li paie
K’il l’abati en un fangart.
Se gent rejoustent d’autre part,
Et cascuns abati le sien.
A ces premiers cops lor va bien,
Ces premiers ont si desconfis
Ke bien cinc cens en ont ocis,
Et bien deus cens à mort navrés,
Et les autres fuiant tornés ;
Et Lioniaus sa gent ralie,
Et ke nus n’en fuie lor prie
Ne n’encauce trop folement,
Ce lor amoneste-il souvent.
Lors issi Roussiaus fius Renart
Desour un grant destrier liart ;
Od lui eut mil bien adoubés,
Et de cieres armes armés.
Les fuians od lui ramena,
Et Perchehaie moult blasma
De çou k’al assanler céi,
Et ke se gent si meschéi.
Devant les autres deus arpens
Vint Roussiaus en sus de ses gens,
Demandant joustes au plus cointe.
Targe ot et glaive à boine pointe,
Et boin heaume et boin destrier sor,
Et uns armes toutes d’or.
Contre Roussiel sans couarder
Vint Coullés li bievres jouster :
Lor glaves ont endoi brisiés,
Et puis les espées saciés.
Hardiement s’entrerequierent
D’estoc lancent et à cop fierent.
Li mil as fouriers assanlerent,
Mais onques ne les remuerent,
Car Lioniaus li fius le Roi,
Cius fist merveilles endroit soi.
A lui prendent li fourier cuer,
Par lui gietent mauvestié puer,
Les secons ont si formenés,
C’un arpent les ont reculés.
Par tans les éussent vencus,
Quant li tiers conrois est venus,
Ses guioit li taissons Grinbiers,
Et le quart ses fius Malapiers
Ki sen conroi maine apriès l’autre,
Armés moult bien, lance sour fautre.
Cist ont les fouriers si menés,
C’à poi tous ne les ont tués :
Plus des deus pars en ont ocis,
Et les autres par force pris,
S’en furent li plusiour navré :
Ke vaut çou ? force paist le pré.
Li fil Renart s’en retornerent,
Et lor prisouniers enmenerent
A Passe-Orguel par grant léece
Par devant Renart ki se drece
Contre ses fius et les acole,
Et puis à Lioniel parole
Et à Coullet le bievre ausi.
Mon païs avés agasti,
Ars et reubé et escillié,
Si avés fait mal et pecié,
Dont je di vous le restorrés
Avant que de moi escapés.
De matin vous ferai tous pendre
U en un fu ardoir en cendre.
Onques pour çou ne s’abaubi
Lioniaus, ançois respondi :
Se nos ocis tu en mourras,
Prent ent deniers, trop mius feras.
Renart se teut : enprisoner
Les fist et puis fist apieler
Ses fius, et puis lor demanda
S’auques lor gent adamaga
Li fius le Roi ne li fourier.
Oïl, si nos puist Dieus aidier,
Ke de quatre milliers de gens
N’en ai-je que dis et huit cens,
Et il quant furent contre vous
Set cens, dont dist Renart li rous,
Vous fustes tout de cuer fali
Et li fourier preu et hardi.
Tandis que Renart devisoit
A ses fius çou ki li plaisoit,
Vint à Noblon navrés où cors,
Criant, mors sui, Bruians li tors.
Sire, vo fourier sunt ocis,
Et Lioniaus vos fius est pris,
Et Coullés li bievres od lui,
Et parmi le cors navré sui.
Quant l’entent Nobles, por mil mars
Ne parlast ; lors dist li lupars,
Ore al assaut, ore al assaut !
Tuit s’armerent et bas et haut :
Rois Nobles méismes s’arma,
Al assaut premerains ala.
Cascuns assali que mius mieus,
Al assaut vint li escurieus,
Et Dans Tardius li limeçons,
Od lui quatre mil conpaignons.
Dis grans mangouniaus fist geter
Rois Nobles pour tout cravanter ;
Tours cravantent, abatent murs,
Grans paour a li plus séurs.
Ysengrins li leus bien s’i prueve,
Cascuns escrie et cascuns rueve,
Assalés vighereusement.
Tibiers li cas as murs se prent,
Et Raous ses fius autresi ;
Li dromadaires assali
Et li bugles et li cameus.
Ces escrie Ysengrins li leus,
Or dou bien faire, boine gent.
Bricemers li ciers vistement
Assaut et Ferrans li ronchis,
Li ostrisses d’ireur espris
Assaut et li grifons od lui,
Le gent Renart font moult d’anui.
Ki dont vist le coc Cantecler
Conme il se couru esprouver,
Li chevaus moriaus et li bous,
Cil grievent moult Renart le rous.