Le Roman du Renart - D. M. Méon — 1826/72
Si ke Rois Nobles asaut Passe-Orguel et Timers li asne escumenie Renart.
Et lors l’Arceprestres Timer
Prist par si haut à recaner,
K’en tentist li mons et li vaus.
Il ot cauciés ses estivaus,
S’iert des armes Dieu reviestis ;
Avoec lui ot deus de ses fis,
Cloke, candeille et benoitier
Orent pour escumeniier
Renart et tous ciaus de s’aïe.
Timers en haut l’escumenie
Et ses gens à cloke sounant,
Et s’eut avoec candeille argant ;
Et quant fist le candeille estaindre,
Si dist pour plus Renart destraindre,
Por çou qu’iert en mauvais estat,
Amen, amen, fiat, fiat.
Timers li asnes s’en repaire,
C’autrement ne set assaut faire ;
Et Renart en mocant s’escrie :
Ke ferai-je ? on m’escumenie ;
Mengier ne porai de blanc pain
Sans talent, u se je n’ai fain,
Et mes pos boulir ne pora
Devant çou que fu sentira.
Cuidié m’ont faire mon damage,
Mais il m’ont fait grant avantage,
Car de pourir n’arai pooir,
Car jou oï dire pour voir,
Ains durra tous entirs mes cors
Tous jours puis que je serai mors.
Jamais jour ne voel estre assos,
Hués as sos, as sos, as sos !
Hué ont tout apriès Timer.
Où Roi Noblon n’ot c’à irer
Por Timer que on ensi hue,
Il tint ne sai mace u maçue.
Lors fist l’assaut renoveler
Dont véissiés traire et gieter,
Lancier d’estoc, ferir à tas,
Et sus et jus et haut et bas,
Et d’espées moult grant tintin.
Lors es-vous l’olifant Fortin,
Un castiel de fust sour son dos
U ens ert Cantecler li cos,
Et Nobles le fius Roi Noblon,
A son col un doré blason.
Od lui ert Hardis li lupars,
Takes li mastins et Grignars,
Bruns li ours, Ysengrins li leus,
De bien faire tuit vighereus.
Od son castiel delés le mur
Se mit Fortins ; assaut moult dur
I ot quant vint al aprocier,
Cil del olifant sont si fier
Que conquis ont del mur cent piés.
Renart le voit, s’en fu iriés,
Od ses deus fius voit cele part,
Maint cop i doune et maint en part,
Et si doi fil moult vighereus ;
Mais Nobles fist là que trop preus,
Que sour le mur se mist contre eaus
De gerre apris, et d’ireur caus
Encontre eaus. Atant es Renart
Ki le feri de son fausart,
Mais cius se couvri del escu
Si que li cops n’a nient valu.
Li fius le Roi ahiert as mains
Renart, con cil ki moult est plains
De grant force et de hardement,
Des bras l’estraint si roidement
K’en ses bras Renart se pasma.
O Renart aler s’en quida,
Mais ce n’iert mie sans bataille.
Roussiaus del espée ki taille,
Feri tel cop le fil le Roi,
K’il ne sot de lui nesun poi ;
Del mur kéi ens es fossés,
A po qu’il n’a le cuer crevés.
Renart kéi droit sour son pis,
C’est la cose ki li fist pis,
Car il se pasma par destrece,
Et Renart en estant se drece,
K’encore mie ne savoit
Que si mal avenu li soit
K’il soit entre ses anemis.
Quant il s’i voit, adont s’est mis
A courre quanqu’il puet au bos,
Apriès lui ceurt toute li os,
Et en laissent l’assaut ester.
Ki vist Grignart apriès aler
Et Volant le levrier salir,
Et Fuellet le braket glatir,
Dire peuist k’il sunt vaillant.
Ysengrins lor dist, ore avant
Estes-vous le kaiiel hustin,
Od lui Roeniel le mastin,
Cil le suiwent, et Renart fuit.
Ce ne li vaut, ataint l’ont tuit,
Desciré l’ont et depillié
Lors a sour se keue pissié
Renart et puis les esproa
Es iols que tous les aveula,
K’en grant tans ne porent véir,
Et Renart prist lors à fuïr.
Ensement Renart escapa,
Dont nostre Signor mercia,
Puis dist que querre ira secours,
Foi qu’il doit Saint Martin de Tours,
Et amenra de gent cent mil.
Des murs l’ont bien véu si fil
Conment del ost est escapés,
Dieus en est moult par eus loés,
Et li Rois est moult corociés
Que Renart n’est pris ne loiiés.
As tentes s’en vont desarmer,
Li Rois fist lors l’iauwe corner ;
Souper vont et empriès coucier
Dusqu’au matin c’on vit raiier
Le soleil, que tuit se leverent,
Et au moustier orer alerent.
Enpriès messe sont revenu,
Si ont un parlement tenu
De ciaus k’al assaut sunt ocis,
Conment seront en tiere mis,
Dont dist en haut li fius le Roi,
Conment avoir les puis ne voi,
S’il n’est u trives u respis,
Car priès del mur gisent ocis,
Dont al avoir aroit hustin :
Endroit de moi par Saint Fremin,
C’on i envoiast loe-jou.
Li plus grant s’assentent à çou.
Ensi conme il se desraisnoient,
Deviers Passe-Orguel venir voient
Wauket le gai le messagier,
Tenant un rainsiel d’olivier :
Trives requiert sans plus un mois.
Volentiers li douna li Rois,
Car il ne desiroit riens tant.
Lors demanda de son enfant
Conme il le fait, s’il est navrés.
Et cil respont emprisounés
Est, mais il n’a nul autre mal.
Rois, c’est vos fius, cuer a roial,
Et si vous mande cent salus
Et li bievres autant u plus,
Ki toute jour nous cante et note
Tout por unate le marmote,
Pour qui amor fait lais et sons,
Et rotruenges et cançons.
De çou li Rois rist, nonpourquant
Avoit le cuer tristre et dolant.
D’une part et d’autre ont dounées
Les trives et bien affiées.
Lors fist li Rois sans arester
Querre les mors et entierer,
Et li fil Renart rehourderent
Lor mur et moult bien s’acesmerent ;
Et Renart va querre secours
Quanqu’il puet aler le grant cours.
A Fierfilleus castiel ala,
Cerastre i trueve, dit li a
Conment Rois Nobles l’a assis.
Et cius li dist, ains quinse dis
I serai od grant ost banie.
Renart s’en part, plus n’i detrie,
En Ethiope s’en ala,
Le Dragon quist, là le trouva
A Roce-Ardant, un castiel fort.
Li dragons a juré le mort
Et le bouline c’ains quinsaine
Ert se gent de Noblon proçaine.
De là se part, au coc Basile
En vient ki tenoit un concile
En un castiel assés felon,
C’on apieloit perdicion.
A Renart le secours otroie.
Renart s’en part et tint se voie.
Tous ciaus a proiié d’Occident,
Et tous les monstres d’Orient ;
Ceus d’Europe et ceus de Turkie,
Et tous ceus deviers Barbarie,
Et tous ceus de le terre d’Aise.
Tout li otroient, s’en est aise,
Et tout cil de Septentrion
Ki moult estoient de grant non.
Ains le quinsaine ot de gent tant
K’il n’est ki les alast nonbrant.
Dedens Passe-Orguel sunt entré,
Castiel i ot et grant et lé.
Moult le couvient au jor d’ui grant,
Car priesque tuit i sont manant
Li laie gent et li Clergiés :
Dieus me gart de metre i les piés !
Lors fist Renart desprisoner
Lioniel, et le Bievre oster
De prison, et tous les fouriers,
Et tous les autres prisoniers.
Lors s’apensa k’il les feroit
Armer si com pris les avoit,
Et les renvoieroit le Roi
Por oster de lui le desroi ;
Mais ains les fera honorer
De quanc’on pora deviser :
Car à Noblon s’acorderoit
Moult volentiers se il pooit,
Et l’atrairoit à sa cordiele,
Car nus contre lui ne reviele
Fors seul li Rois, et s’il l’avoit,
Le remanant lués conquerroit.
Ensi conquiert li anemis
Par le grant tous dis les petis.
Ensi com pensa il le fist,
Mais à ses barons ains le dist ;
Tout li grant signor li loerent,
Et à çou moult bien s’acorderent.
Lors fist Lioniel amener,
Et de quanqu’il pot honourer,
Et le bievre et tous ses fouriers,
Od lui les tint cinc jors entiers :
Amour lor moustre, non haïne,
Et lors fist venir la Roïne
Ki estoit mere Lioniel.
La Dame ot viestu un mantiel
D’un drap de Tarse d’or bendé,
Et d’un cier sebelin fourré :
Li atache avoec les tassiaus
Valoit l’ounor de deus castiaus.
Li Luparde ert od lui Harouge,
Ki viesti ot un mantiel rouge,
Et si avoit de tel drap robe ;
Avoec eles Hersens la love
Vint, et Lionel saluerent,
Et dou Roi moult li demanderent,
Et d’Isengrin et dou Lupart,
Et il dist, bien, se Dieus me gart ;
Et conment estes-vous çaiens ?
Moult bien, ce respondi Hiersens :
Car Renart nous i fist venir
A cui nus ne se puet tenir,
Car plus set de barat que nus.
Par lui fu Rois Nobles deceus
Quant il fist le fisicien,
Adonc de nous se venga bien.
Adonc respondi Lioniaus,
Qui estoit apers Damoisiaus,
Vos requiert Renart de folie ?
Nenil, se Dieus me benéie,
Onques ne nous en aparla,
Mais moult laidement engigna
Nos maris, et par l’aïmant,
Quant il lor fist à entendant
De lui ensi que vous savés,
Et si fu au Roi grans viltés
Quant sans raison il fourjura
Ma Dame et quant il l’en cacha
Et bouta fors de sa maison,
Il en fist moult grant mesprison :
Car n’est mie remès en lui
Qu’ele n’ait et honte et ennui.
Renart tint bien le Roi por sot,
Mauvais fait croire quanc’on ot,
Et mes maris et li Lupars,
Cascuns en fu uns drois musars :
Car il nous ont fait sans raison
Avoir honte et vilain renon.
Mais moult devons savoir bon gré
A Renart qui nous a honeur porté
Et fait ce qu’il afiert à nous,
Et ausins a-il fait à vous.
Lors fist Renart l’iaue corner,
Séoir vont après le laver ;
De disner estoit pieça tans,
Ke il estoit miedis grans,
Et au premier mès aporter
Fist Renart Renardiel canter
Douce Dame, par amour fine
Dites nous une chançonnette.
Droiz est que je m’en entremette,
Renart, puis que vous le voulez,
Et de moi ert cest chanz chantez
Qui volentiers fu escoutée,
Au secont mès lors Renart prie
Le bievre, s’il li plaist, qu’il die,
Pour amour de ciaus qui ci sont,
Une cançon, il respondront.
Il dist volentiers le fera,
En haut à canter commença
De cuer gai et de volenté,
Com cil ki aime corelment
Le Roïne, et dist ensement
A cascun mès les fist canter
Renart, et apriès le lever
Dou mengier, les fouriers mena
Véoir ses gens, tous lor moustra.
Lioniaus est tous abaubis
U Renart a tant de gent pris :
Bien voit Renart a gens sis tans
Que li Rois, tant est cler véans,
Et bien voit se Renart voloit,
Le Roi et ses gens ociroit
Et seroit rois sans contredit,
Et bien voit c’on li fait despit
C’on l’a en Passe-Orguel assis,
Et tout le païs en fu mis,
Et si nous fait chi tele honour.
J’aie de men cors deshounour
Se jamais sui encontre lui,
Et se mais a par moi anui.
Li Rois de ce nient ne savoit,
Blancart par devant lui avoit
Fait amener. Blancars cria
Mierci : li Rois li pardouna
Par si que il des siens seroit.
Il dist volentiers le feroit.
A le nave le fist aler
Li Rois, et li kierke à garder
Avoec les autres marouniers.
Blancars l’otroïe volentiers.
Tandis vint Renart as fouriers,
Et au fil le Roi tous premiers,
Et li dist, sire Leoniel,
De gerroiier ne m’est pas biel,
Au mains encontre mon signor :
Reverense, foi et amour
Li doi et il moi autresi :
Or m’a cacié dusques à ci
Hors de mon liu et de me tiere,
Et puis à ost çaiens m’ensiere
Et a tout le païs gasté,
Sour moi fait trop grant cruauté ;
Mais ce fait ses mauvais consaus,
Qu’enviers moi ont ouvré que faus,
Si conme Hardis li lupars
Ki viers moi est fel et grignars
Por sa feme, si que savés,
De qui je fis mes volentés
Ens el point que li Rois l’ot ciere,
Dont dreça Lioniaus le ciere
Et dist, Renart, de çou ouvré
Avés tant que vous en sai gré :
Con faus ouvroit contre me mere
Li Rois, ses drois k’il le conpere.
Et Renart dist, li Rois m’en het
A tort, sans raison, Dieus le set,
Ke se faite i ot mesproison,
Amors ki m’avoit en prison,
Le fist, on ne m’en doit blasmer,
Et si le m’estuet conparer.
Et Leoniaus li respondi :
La gerre n’est pas pour çou chi
Sans plus, mais de vous se sunt plaint
Devant le Roi maintes et maint,
Si conme Ysengrins vos conperes.
Et dist Renart, çou est uns leres :
De quoi se plaint, dites le moi.
Leoniaus dist, foi que vous doi,
Il dist sen fil pendre fesistes,
Et sen autre fil ocesistes,
Mais l’amende en est sour le Roi,
Si avés ouvré contre loi
De se feme vostre conmere,
Et si dist foi k’il doit sen pere
Ke en la foriest le fesistes
Depillier, dont trop meffesistes,
Car on dist ce fu sans raison.
A maniere de campion
S’en conbati en camp meslé,
Et là sot-on de verité
Que il n’ot coupes en ce cas.
Devant le Roi Tibiers li cas
Se replainst de vous, jel’ oï,
Et Cantecler li kos ausi
Se replainst, et en plaine Court,
K’oïr le porent li plus sourt.
Si se plainst li Lupars de vous,
Et Ysengrins c’andoi sunt cous,
Et li Rois mes pere autresi
Traï, decéu et houni
Sont par vous de vostre aïmant,
Car ma Dame en tenés soignant,
Le luparde et Hiersent ausi.
Et Renart dist, je vous afi
Par foi com loiaus chevaliers,
Mi centisme, s’il est mestiers,
C’onques le deshounour le Roi
Ne fu viers me Dame par moi,
Ausi ne fis-je as autres Dames
Dont sour eles doie estre blames ;
Mais servies jou et mi gent
Les avons par foi loiaument,
Et se nus el dire en voloit,
Je di que il en mentiroit,
Et l’en rendroïe recréant,
S’il en voloit aler avant
Par avoé u de men cors,
Mais que çou fust Bruians li tors,
U li lupars, u Ysengrins,
U Dans Roeniaus li mastins
Ki tout sont gent fort et poissant ;
Mais g’i sai men droit si très grant,
K’il n’aroient pooir à mi.
Sire Lioniel, je vous pri
Que vous enviers le Roi faciés
K’entre nous deus ait amistiés ;
Quant vous plaist en poés r’aler,
Et les trois Dames remener,
Et autresi vos conpaignons,
Et si vous pri en gerredons
K’à demain aions parlement
Jou et li Rois d’acordement
Par quoi je puisse à lui parler :
S’ai meffait, près sui d’amender.
S’il m’a meffait, je li pardoins ;
De ceste pais le don vous doins,
Et si sai bien quant le saront
Mi gent, que il m’en blasmeront,
Car dis tans ai gens que li Rois,
Viers moi a tort, miens est li drois,
Mais pour çou ne le lairai mie :
Il s’essauce ki s’umelie.
Montés, vo prison vous pardoins,
Et tous vos conpaignons vous doins,
Et les trois Dames, en mener
Les poés, vous n’avés qu’ester.
Por Dieu parlés au Roi pour mi
Par quoi il me tiegne à ami :
Sour vous m’en met con d’amender
De quan c’oserés demander.
Lioniaus voit k’il dist raison,
Puis monte où destrier Arragon
Trestous armés si com fu pris,
Od lui si conpaignon de pris ;
Et Dame Orguilleuse monta,
Leoniaus ses fius l’adestra.
Li luparde et Hiersens monterent,
Assés fu ki les adiestrerent.
Tout ensement viers l’ost s’en vont
Tant que as tentes venu sunt.
Quant les ont parçus cil del ost,
Au Roi le vont dire tantost.
Li Rois i vint plus tost k’il pot,
De joie ne puet dire mot,
Et le premier mot k’il parla,
Ce fu que il les bienvigna
Tous, mais as Dames fist sanlant
De poi d’amor et lor dist tant,
Lioniel biaus fius, se n’estoit
Por vous, mes cors se vengeroit
De vo mere ki m’a houni,
Et de ces deus autres ausi
Ki ont fais wihos lor maris,
Dont en mon cuers sui moult maris.
Et Lioniaus li respondi,
Gentis peres, pour Dieu mierci,
S’autrui qu’à vous çou dire ooie,
Oiant tous l’en desmentiroie
Et l’en feroie recréant,
S’il çou porter voloit avant,
Armés sour mon ceval là fors,
Ke loiaus Dame est de sen cors,
Et ausi ces autres deus Dames,
K’à tort est sour eles diffames
Vilains, c’offre-jou à prouver,
Se nus en voloit mesparler.
Tuit se teurent, nus ne parla,
Et Lioniaus au Roi dit a
Tout çou que Renart li ot dit,
Que vous avés devant oït,
L’ounour k’il lor fist, et les gens
K’il a tant et milliers et cens ;
Contre un de nos en a bien vint.
Ains tel joie ne nos avint
Con de çou, s’à lui avons pais,
Trop set de gerres et de plais.
S’il voloit tuit seriens ocis,
Soie merci que je sui vis
Et mi conpaignon ensement.
A demain jour de parlement
Aiiens à lui. Li Rois l’otrie
Et toute l’autre barounie.
Pris fu li jours, Renart le seut,
Et ceste cose bien li pleut.
A lendemain bien temprement
S’en vint Renart al parlement.
Li Rois i estoit jà venus,
Od lui de ses plus esléus,
Si conme li lupars Hardis,
Ki moult avoit et los et pris ;
Li ostrisses et li grifons
Et Ysengrins. Tous les barons
Ne puis mie ramentevoir ;
Mais tant vous os dire por voir,
Que Renart ot plus gent assés
Ke li Rois, et trestous armés
Couvertement desous lor robes.
Renart ki ne siert fors de lobes,
Vint au Roi, si s’umelia,
Merci et pardon li pria,
Au lupart et à Ysengrin.
Que vaut çou ? Pais fu en la fin
Entre Roi Noblon et Renart :
A Ysengrin et au lupart
Fist li Rois faire pais ausi
Si k’il sunt à Renart ami,
Et si ont lor femes reprises,
Et en plus grant fuer assés mises
K’eles ne furent onques mais.
Dame ghile ki moult ot plais,
Fu à le pais et le basti,
Car li pais fu toute par li.
Ce fu drois k’ele ert aournée
D’une reube trop desghisée,
Car ele avoit cote et mantiel
Fait très le tans Luciabiel ;
Ses fist uns ouvriers de Blangi,
Car ele avoit mantiel parti
De losenges contre mençoigne,
Bordé d’un orfrisiel d’antroigne,
Et de proumetre sans douner
L’avoit fait à porfil fourer.
L’atache en ert de doublerie,
Et li tassiel de loberie ;
De fause couvenence avoit
Capiel sour son cief, et s’estoit
Montée desus une mule.
Plus mervilleuse ne fu nule,
Blance, bise, bleue ne perse
Ne fu, mais trop estoit diverse,
Car ele ert toute tavelée
Par le cors de fause pensée ;
De mentir et de parjurer
L’ot faite de nouviel fierer.
De fauseté sambue, et siele
Eut ki faite ert toute nouviele
Dedens le ville de Hedin.
Uns lorains ot fait à or fin
Ki de faus jugement estoient ;
Fol sunt cil ki à çou s’apoient,
Moult en aront mauvais loiier.
Mais je ne voel pas oubliier
Conment la mule estoit nommée,
Fauve ert de se Dame apielée.
Tout ensement vint Dame Ghille
Avoec Renart à ce concilie ;
Le pais basti et devisa,
Et fist que li Rois pardouna
Tous ceus ki erent si meffait
Son mautalent : ç’a ghille fait,
Et si fist ghille que Renars
R’out Malpertruis, et par ses ars
A repris se france moullier,
Par pais se vont entrebaisier.