Le Roman du Renart - D. M. Méon — 1826/77
Einsi com Renart se confesse à l’ermite en un hermitage.
Renard conmence ses meffais
En gros et trestout à uns fais,
Et dist, que volés que vos die ?
Onc bien ne fis jor de ma vie
Se jou ne cuidai faire mal ;
J’ai fait ocire maint vassal
Et fait wihot maint vaillant home,
Onques bien ne fis, c’est la some.
Bastie ai mainte traïson
Et mainte grande mesprison,
Les bones tekes en ostés,
Et les mauvaises i metés.
Teus sui, ore me rasotés,
Et puis çaiens me retenés
Por estre en vo rendation,
Car je n’ai autre entention ;
Mais ançois voel oïr par ordre
Tous les poins ki sont en vostre Ordre,
Que vous mengiés, dont vous vivés,
Ki si très lonc de gent manés,
Et ke viestés à vo car nue.
Une haire de poil velue,
Dist le preudom, et vois nus piés,
Ne ne sui lavés ne baigniés,
Et di mon sautier cascun jour,
Et puis si vois à mon labour.
A mienuit matines di,
Que Dieus ait de m’ame merchi,
Et le jour c’une seule fois
Ne mengue el que tu ci vois,
Et si n’en preng mie mon sol.
Et dist Renart, moi tieng à fol
Ki çaiens rendre me voloie,
Si m’aït Dieus, que je cuidoie
Que mengissiés à vo devis
Widecos, faisans et piertris,
Capons en rost et venison,
Et béussiés vin à foison,
Et éust od vous biele dame :
Ce cuidai-jou, foi que doi m’ame ;
Mais puis que vous iestes si fais,
Vous et vo conpaignie lais :
Vos Ordres n’est pas bons à mi,
Je ne le tieng pas à ami.
A Dieu vous conmant, je m’en vois,
Çaiens ne renterrai des mois.
A Malpertuis vois ma maison
Je has tele relegion.
En se maison est revenus,
A grant joie i fu recéus
De sa feme et de sa maisnie,
Cascuns por lui fait ciere lie.
Tandis que Renart sejournoit
A Malpertuis, grans nons estoit
De lui par le monde espandus.
De çou que si bien s’iert tenus
Contre le Roi et son pooir,
Et que il par son grant savoir
A pais faite à se volenté,
Par quoi tuit l’ont mis en cierté
Haut et bas, et petit et grant.
Tant va li siens nons ensauçant,
Que il est volés trestout cler
Et de cha mer et delà mer,
Parmi le terre des Paiiens
Et par celi des Crestiiens,
De ses fius conment rendu sont
Et conment amendées ont
Leur Ordres et levées haut,
Et que sans Renart nus ne vaut,
Ne ne puet monter en avoir,
N’en che siecle riquece avoir,
Ne sousmetre son anemi.
Sans Renart ù n’a giu parti
De ciaus sour qui on a envie,
N’ert nus vengiés sans renardie.
Tuit el que pant sont mais Renart,
Cis usages par tout s’espart ;
Tant mouteplie cil usages,
C’on tient mais à fos les plus sages :
C’est les preudomes qui Diu aiment,
Teles gens au monde fols claiment
Ypocrites et papelars ;
Mais ciaus en qui cuers est Renars,
Cil sunt tenu prudome et sage,
El monde ont tuit malvais usage,
Et clerc et lai, et conte et roi,
El monde a poi ù nient mais foi.
Or revenrons au non Renart
Ki par tout le monde s’espart,
Tant qu’en Acre est ses nons venus,
Des Templiers fu bien recéus
Et des Ospiteliers ausi ;
S’en ont entr’aus un plaist basti
Et pris un jour de parlement
D’avoir Renart en lor couvent,
Et un concille général ;
Mais li cose tourna à mal,
Car li Templier avoir le voelent
A par aus, et de çou se doelent
Durement li Ospitelier ;
S’en prisent forment à tencier
Li Temples et li Ospitaux ;
Jà i éust bataille entr’aus,
Mais à çou se sont acordé
C’à Rome à cest premier esté
Par devant l’Apostole iront,
Del tout sour lui s’en meteront,
Et çou que il en ordenra,
Que cascuns à çou s’en tenra.
A çou s’en tinrent, si fu fait,
A lor jour vinrent tout à plait
Li Templier, cil del Hospital,
Là ot concille général.
Renart i fu c’on ot mandé,
Si i furent moine et abbé,
Roi et conte, duc et eveske,
Chevalier, prelat, arceveske,
Li cardounal, li patriarces,
Icil faisoit moult de manaces
Pour çou k’il viut avoir Renart,
Et ara par li seus en part,
Ce dist ; mais ore a tant parlé
Sus et jus et fu acordé
Que cascuns à çou se tenroit
Que l’Apostoles l’en donroit.
A lendemain fu li jours mis,
L’Apostoles com bien apris
Assist avoec les Cardounaus,
Renart ens es plus haus estaus.
Li Papes a dit as Templiers
Et ausi as Hospiteliers,
K’il remegnent à lendemain
Oïr sentence bien très main,
Et aient lor petitions
Formées bien, et lor raisons,
Et k’il resnent par avocas,
Par quoi il n’i croisce baras.
Oïr viut par desputison
Liqués ara Renart u non,
Ne liquels le doit mius avoir ;
Parler couvenra par savoir.
Lors dont li Patriarches dist
Ke par celui Deu qui le fist,
Que tout de droit et par raison
Doit avoir de Renart le don.
Et Renart lors li respondi :
Sire, je vos tieng à ami,
Et pour l’amour que à vous ai,
Un mien fil vous deliverrai,
Sages et soutius et viseus,
En boisdie malicieus.
Mes fius est de dame Hiersent,
De lui l’oi quant fu en jouvent,
Non a li vallés Souduians,
S’est de ma science saçans :
Vés le chi, vos soit, menés l’ent.
Et cius cinc cent mercis l’en rent :
Le vallet prist, si l’en mena,
En son païs s’en retourna,
C’onques n’i mist plus lonc sejor.
Lendemain revinrent au jor
Cil del Ospital et dou Temple,
De clers, d’avocas li Cours emple,
De dus, de contes, de prelas.
Li conmuns peules s’assist bas,
L’Apostole ont en haut assis,
Renart ont par dalés lui mis.
Plus bas sisent li Cardounal,
L’autre clergiés est plus aval :
Li doi fil Renart, li rendu
Furent au concille venu.
Atant se leva uns Templiers,
Car bien vit qu’il estoit mestiers,
Et dist : Signor, nous somes chi
Venu, s’avons un plaist basti
Encontre les Ospiteliers.
Je parole pour nous premiers,
Et proi mon signor l’Apostole
K’il entende bien no parole.
Nous demandons par droit Renart,
Se ce est par kemun esgart
Que nous soumes deffendéour
Sainte Eglise et conbatéour ;
Siergans avons et chevaliers,
Moult nos couvient de sodoiier,
Et moult or et argent despendre,
Tout por Sainte Eglise deffendre.
Par le monde avons moult maisons,
Tieres, rentes et warnisons
Desous maint grant signor poissant
Ki souvent nos font maint tort grant,
S’avons mestier k’il nos maintiegne,
Encontre tous nos drois bien tiegne :
Car se nous ne mouteplions
En avoir, pau pooir arons
De Sainte Eglise soustenir,
Ains nous en convenroit fuir
Et vuidier tiere de Surie :
Ça outre venroit à navie
De Babilone li Soudans.
Sains Peres, or soiiés saçans
Que par no gent est deffendue
Encontre le gent mescréue
Sainte Eglise et Crestiientés.
Sains Peres, çou est verités,
Si devés bien à çou descendre
C’aiiens Renart s’il s’i veut rendre,
Sains Peres, car li demandés.
Lors fu Renart araisonés
Dou Pape, et il li respondi,
J’ai bien çou k’il ont dit oï ;
Oïr voel les Ospiteliers :
A ciaus à cui plus ert mestiers
Lonc çou que j’orai me tenrai,
Se j’ai pooir de rendre moi,
Car jou ai ma feme vivant.
Li Papes respont en riant :
De rendre je vous doins congié.
Saint Pere, dont prenderai-je
Relegion quant je vaurrai,
Puis que de vous congié en ai.
Lors se lieve uns Ospiteliers,
Sages hom ert, s’ot non Reniers.[1]
En haut parla et par compas :
Signeur, dist-il, et haut et bas,
Entendés no peticion,
Et si nos demandons raison.
Li Templier demandent Renart
A avoir par aus en lor part ;
Mais avoir mius nous le devons,
Et par moult de boines raisons,
K’avant fumes-nous k’il ne furent,
Dont encore cartres nos durent
De princes, de Rois vint grans briés,
Et si faisons trop plus de griés,
As Sarrasin que li Templier.
Au besoing somes chevalier
Et maintenons à nos espées
Contre Sarrasins les mellées ;
Et en nostre hospitalité
Ki est plaine de carité,
Sont gari, levé et coucié
Li navré et li deshaitié,
Ki par defaute fuissent mort,
Ki puis sunt et haitié et fort,
Et font puis sour les Sarrasins
Grandes batailles et hustins.
Atant vous di se li Templier
Nos voloient adroit aidier,
K’il n’éussent sour nous envie,
Nous ariemes toute Surie,
Jherusalem et toute Égypte,
Et Babilone fust sougite
Grant tans a à Crestiienté ;
Mais as Sarrasins sunt tensé,
Sour nous envie ont, nous sour eus,
Ensement est partis li geus.
Tant di se nos maisons n’estoit,
Li Crestiientés periroit,
Au mains ceus de delà le mer,
Sans nous ne poroient durer
Mie crestiien demi an,
Ains alast li tiere à lagan.
Quant li gent d’estrange païs
Sunt passé mer, j’en sui tous fis,
Ki dou travail sont dehaitié
Li plusiour, et s’il aaisié
Ne fussent en nostre maison,
S’alaissent à pierdission,
Et tel cent mil i fuissent mort,
Puis ont esté sain, grant et fort,
Et bien la tiere deffendue
Encontre la gent mescréue,
Et le deffendent au jour d’ui.
Saint Peres, pour no maison sui,
Renart demandomes, Sains Pères,
Por estre maistres gouverneres
De nous et de nostre maison,
Bien savés que je di raison.
Lors li Papes li respondi :
L’un de vous deus i a failli,
Partir ne se puet mie en deus.
Renart respont adonc as deus,
S’iert uns prestres, jou si ferai,
Les deus abis je viestirai,
Mes viestimens sera partis,
A diestre je serai viestis
De viestement d’Ospitelier,
Et à seniestre de Templier.
A seniestre barbe lairai,
A diestre rere le ferai,
Bien les gouvernerai tous deus.
Adont i ot grant joie entr’eus,
Viesti l’ont si c’avés oï.
Li Papes les en raviesti,
A Renart ont fait sierement
K’il feront mais à son talent.
Lié sunt c’avoec eus est Renart,
Lors est li parlemens espars.
Atant lairai d’iaus à parler,
A Renart m’estuet retourner
A cui Fortune en est venue,
Sour un palefroi à sambue,
Viestie moult très ricement,
Mil mars valent si viestement.
Fait et fourré sunt d’aventure,
Signié d’or par envoiséure.
La Dame ensement acesmée,
Jusqu’à Renart n’est arestée.
Ele li a boin jor oré,
Et puis si a en haut parlé :
Renart, jou te voel coroner
Sour ma ruée et en haut lever,
Car tu l’as trop bien desiervi,
Car nus n’est riens encontre ti.
Tout sunt mais Renart et Renardes,
Clerc et lai witart et witardes,
Viel et jouene, grant et petit,
Montés, bien l’avés desiervi.
Et Renart li dist, non ferai,
Jà sour vo ruée ne serai,
Car se vostre ruée tornés,
D’ausi haut si bas m’asserés.
Ele respont que non fera,
Jamais au tans ki ore va
N’iert tournée un seul tor par moi ;
Tu as abatu vraie foi,
Loiauté ai desous mes piés,
Jamais nul jor n’ert redreciés,
Car fausetés l’a abatu ;
Sire Renart, par vo viertu
Orgius a mise humilité
Bas à mes piés en grant vilté,
Ki pour foi vraie est esperdue,
Renart, que tu l’as abatue,
Et pour loiauté se gaimente,
Ki gist desous mes piés s’i ente.
Montés, Renart, car à vo diestre
Arés Orguel et à seniestre
Iert dame Ghille à tot Fauvain,
Fauseté vo cousin germain,
Ki fu fius vostre oncle Boisdie,
Si l’ot de dame Trecerie
Ki en cest monde est moult crueuse,
Felounesse et malicieuse.
En ma ruée le fai ramper
En signe que pour tout tuer
En se main tient une faucille
Dont el monde droiture escille,
Et loiauté en a vencu,
Et desous mes piés abatu.
Conme faucille combre et torte
Est loiautés au monde morte,
Jamais jor ne resourdera.
A ice mot Renart monta
Sour la ruée tous coronés,
D’orguel et de ghille adiestrés,
Viestu de l’Ordre des Templiers
Mi partis as Hospiteliers.
A ses piés fist ses fius séoir
Sour la ruée, k’il dist por voir
S’ensi fust k’il déeust morir,
K’il poroient par droit tenir
Le leu de lui conme si hoir :
Ce puet-on au jour d’ui véoir.
Montés est, Dieus penst del abatre ;
Sen monter ne viut nus debatre,
Ains est coronés conme uns rois.
Fauser fait jugemens et lois,
Fortune a se ruée escotée
Si que mais n’ert par li tornée.
Jamais n’en ert Renart mis jus,
Se Dieus nel’ fait ki maint lassus :
Car au tans ki orendroit va,
A tous jours mais i demourra.
Ce nos dist Jakemars Gielée,
Car vraie fois est adossée,
Au jour d’ui et humilités,
Et entre piés gist loiautés,
Et carités est refroidie,
Et larghece est des cuers banie,
Et li visce sunt de grant fuer,
Car il sunt mais en cascun cuer,
S’en ont encacié les viertus.
De Renart ne vous dirai plus,
Véoir poés apiertement
Conment siet el haut mandement
En son le ruée de fortune,
Par quoi somes en amertume.
La figure est fins de no livre,[2]
Véoir le poés à delivre,
Plus n’en ferai chi mention.
En l’an del Incarnation
Mil et deus cens et quatre vins
Et huit fu chi faite li fins[3]
De ceste branche en une ville
Que on apiele en Flandres Lille,
Et parfaite au jour Saint Denis
A le mere au Roi Jhesu-Cris
Prions qu’ele nos doinst si vivre
Que de Renart soions delivre,
Et ausi de tous autres visces,
Si c’o Dieu soions es delisces
Avec la Sainte Trinité
Lasus ens en se Maïsté.
Ce nos doinst li Fius et li Peres
Et li Sains Espirs nos Sauveres,
Ki vit et regne et regnera
Per infinita secula.
- ↑ Al. Sages hom fu et biaus parliers.
- ↑ La figure dont on vient de lire la description, et qui se trouve à la fin des manuscrits, étoit trop grande et trop compliquée pour pouvoir être réduite.
- ↑ Le manuscrit 2736 porte 1289, celui 7615 porte 1290, et le manuscrit de Cangé, no 69, 1292 ; ces dates différentes paroissent n’avoir de rapport qu’à l’époque de la copie de ces manuscrits.
- ↑ Dans le manuscrit 2736, au lieu des quatre vers suivans, on lit ceux-ci :
Et chius qui venir i vaura,
Chi endroit trouver le porra
Conment on puet venir à glore.
On i vient par loial memore
Et par œuvres de carité,
Dont on doit bien avoir pité
De chiaus qui par lor trecerie
Font tant en ceste mortel vie,
K’il ont tout le monde en lor main :
Elas ! et il n’ont nul demain.
Par renardie et par fourtrait
Se sont à grant hautece trait.
Tel gent sont au monde conté
K’il sont en le roe monté :
Por coi en fait-on mention ?
C’est roe de dampnation ;
Tous tans en convient trebucier,
Et fait le lasse ame embuscier
Où ele n’a pais ne repos.
Dont doit estre tous nos pourpos
A lui sagement atourner,
Que li roe ne puist tourner
Quant on i ert assis en roce ;
Car n’en tresbuce ne bescoce
Ki en loiauté se maintient.
Tout adès fermement s’i tient
Ki aime Diu et carité,
Et a de son proisme pité :
Car qui sagement s’i avise,
Cele roe que on devise,
N’est sans plus que cis morteus mondes
Dont, s’on doit mendier les mondesEt falir as biens temporeus,
On veut tantost dire pour eus
Que fortune trop les desmonte.
Mais à tel cose riens ne monte :
Car le povres qui n’est trecieres,
Faus, ne menteres, ne pecieres,
Et aime canque Dex li preste,
A le roe legiere et preste
Entre ses gambes à delivre,
Et c’est li roe ki li livre
Le haute glore à sen tourner.
Il s’en fait malvais destourner ;
A chou ne faut fors que bien faire.
Cil qui atournent lor afaire
En dolour et en lecerie,
Et tant œuvrent de trecerie,
Et ont fausseté en le bouce,
Et le parole humle et douce,
Et c’est pour autrui decevoir ;
On ne puet en aus percevoir
Le fausseté k’es cuers lor maint,
Ensi en sont decéu maint.
Mais cil sont assés plus dechut
Ki de lor mal ne sont perchut,
Que cil qui point ne s’en perchoivent.
De chiaus k’ensi le gent dechoivent
Et sont en grant possession,
Veut-on faire le mention
K’il sont de le roe segneur,
Mais c’en sont tout li mains gregneur.
Se lor conscience est perie,
N’est pas loiauté amenrie,
Ne carités prise ne morte.
S’est trop faus qui se desconforte
S’il voit les faus monter en pris,Et les povres et près et pris.
De Renart est teus li recors
K’il destruit l’ame pour le cors.
Orgiux se fait dampner sans fin,
Guile ne maint point en cuer fin,
Mais ens ù faus cui fauve porte,
Que jà n’enterra en le porte
U carités met ceus en voie
Cui loiautés ses biens envoie.
Or prions le Roy Jhesu-Crist
Qui pour nous char humaine prist,
Que de tel roe nous destourgne,
De coi l’ame en infer ne tourgne
A Renart fait les faus aler
Et par fausseté avaler :
Car de lui est faus li conduis.
Ki par lui s’est nourris et duis,
Il est et dechu et novisses.
Prendons vertus et laissons visses,
Pour renardie loiauté,
Et pour orguel humilité,
Pour fausseté qui lait cop fiert,
Prendront le droit qui i affiert,
Et pour Guile, à dire le voir,
Si ferons à Diu no devoir,
S’en arons glore parmanable.
Là vont li boin et li rainable ;
U Diex tous et toutes nous maint.
Éureus est chius qui i maint.
Vès-ci le roe que j’ai dite,
Ki doit estre des boins maldite.
EXPLICIT DE RENART.