Les Œuvres de François Rabelais (Éditions Marty-Laveaux)/PantagruelinePrognostication/1
Du gouuernement, & ſeigneur de ceſte année.
Chapitre premier.
velqve choſe que vous diſent ces folz Aſtrologues de Louain, de Nurnberg, de Tubinge, & de Lyon, ne croyez que ceſte année y aie autre gouuerneur de l’vniuerſel monde que Dieu le createur, lequel par ſa diuine parole
tout regiſt, & modere, par laquelle ſont toutes
choſes en leur nature, & proprieté, & condition :
& ſans la maintenance, & gouuernement duquel
toutes choſes ſeroient en vn moment reduictes à
neant, comme de neant elles ont eſté par luy produictes
en leur eſtre. Car de luy vient, en luy eſt,
& par luy ſe parfaict tout eſtre, & tout bien : toute
vie & mouuement, comme diſt la trompette euangelicque
monſeigneur ſainct Paul Ro. xj. Doncques
le gouuerneur de ceſte année, & toutes autres
ſelon noſtre veridicque reſolution ſera Dieu tout
puiſſant. Et n’aura Saturne, ne Mars, ne lupiter,
ne autre planete, certes non les anges, ny les
ſaincts, ny les hommes, ny les diables, vertuz, efficace, ne influence aucunes, ſi Dieu de ſon bon plaiſir ne leur donne. Comme diſt Auicenne que les cauſes
ſecondes n’ont influence, ne action aucune, ſi la cauſe
premiere n’y influe. Dict il pas vray[1], le petit bon
hommet ?
- ↑ Dict il pas vray ?… — Œuvres, 1542 : « Et en ce dict vray, combien qu’ailleurs il ait rauaſſé oultre meſure. »