Les Œuvres de Mesdames Des Roches/Madeleine des Roches/Sonnet 35
Abel L'Angelier, (p. 43).
Ô ſeigneur Dieu eſleue ma penſee,
Fay que i’embraſſe en grand deuotion
Ta douloureuſe & ſaincte paſſion,
Payement ſeur de la loy tranſgreſſee.
À toy mon Dieu ma priere eſt dreſſee :
Ayde Seigneur mon imperfection,
Deliure moy de tant d’affliction,
Qui m’a du Ciel vers la terre abaiſſee.
Graue en mon cœur ta iuſte verité,
Guide mes pas au ſentier d’equité
Benin ſeigneur en qui ſeul ie me fie.
Ie veux offrir à ton ſacré autel ;
Ô Dieu viuant mon eſprit immortel.
Qui mort en moy en toy ſe viuifie.