Les oeuvres poétiques de Clovis Hesteau de Nuysement 1578/Comme on voit en esté
X.
Comme on voit en esté une bruiante nue,
Que le roide Aquilon va parmy l'air roulant :
Pleine de tous costez se crever grommelant,
Et vomir le discort qui la rendoit esmeue :
Tantost embraser l'air d'une flame incogneue,
Tantost semer la gresle, & d'un tour violent,
Rouer un tourbillon qui noir se devallant,
Enveloppe le chef d'une roche chenue.
Ainsi mon estomac comblé d'amoureux feu,
Qui de tes chauds regards croist tousjours peu à peu,
Veut vomir la douleur qui le brusle & l'entame :
O beaux cheveux, bel œil, ô glace, ô flame, au-moins,
Puis qu'avez pris, espris, gelé, bruslé mon ame :
Cognoissez mon amour dont mes maux sont tesmoins.