Les oeuvres poétiques de Clovis Hesteau de Nuysement 1578/Helas divine face
XXXIX.
Helas divine face, helas divins regards,
Qui seuls peustes forcer ma liberté premiere :
Helas divine main dont la force guerriere,
A fiché dans mon cueur cent & cent mille dards.
Helas divins cheveux folastrement espars,
Autour des beaux Soleils peres de ma lumiere :
Helas divine voix qui feustes la courriere,
Du Dieu qu'en vostre honneur je fuy en toutes pars.
Quelle austere rigueur, & quelle Loy trop dure,
Quel destin vous esloigne, & d'un sinistre augure,
M'offre en vous ravissant un monde de mal-heurs.
O Ciel jaloux de l'heur qui suit l'humaine race,
Par vous je suis sans eux un pré couvert de glace :
Qui ne peut avancer le germe de ses fleurs.