i L’an quatre cens cinquante six,
Je, François Villon, escollier,
Considerant, de sens rassis,
Le frain aux dens, franc au collier, 4
Qu’on doit ses œuvres conseillier.
Comme Vegece le raconte,
Sage rommain, grant conseillier,
Ou autrement on se mesconte… 8
ii En ce temps que j’ay dit devant,
Sur le Noel, morte saison,
Que les loups se vivent de vent
Et qu’on se tient en sa maison, 12
Pour le frimas, près du tison,
Me vint ung vouloir de brisier
La tres amoureuse prison
Qui souloit mon cuer debrisier. 16
Le Lais. — Sources : ABCFI (cf. Commentaire et Notes).
Titre : Le lais François Villon A ; Le testament de maistre François Villon B ; Le petit testament Villon C ; Le premier testament maistre François Villon F ; Le petit testament maistre François Villon I.
i. — 1. Mil quatre B ; En l’an mil quatre C ; L’an mil quatre I.
ii. — 10. Sur le nouvel A. — 11. se manque dans BCI ; du vent CF. — 12. les frimas I. — 14. Me prinst le vouloir A ; Y me vint vouloir C ; Me vint voulenté I. — 16. Qui me souloit bien A ; Qui faisoit CI.
