Adonques commanda Butor tout maintenant
Qu’il demenassent joie, li petit et li grant ;
Mais tout adès estoit tourmentez por Bruiant
Adont par le prael fist on joie moult grant,
Pour Brun de la Montaigne et la dame plaissant
Qui relevée estoit a celui jour d’anfant.
Si tost com ot soupé, li hiraus se leva
Et a plaine gargate esranment s’escria :
« Seigneur, or entendés, pour Dieu escoutés la :
« Il est bien verités que ceans de tiex a
« C’onques nul plus hardi nature n’en forma,
« Et s’i a tel ausi qui troys lances brissa,
« Et s’i a tel ausi qu’a la terre versa,
« Car je vi tous les coups que chascun y frapa ;
« Et s’i ot ausi tel qui chevaus espaula ;
« Et benoit soit de Dieu qui le pris aserra
« Au meilleur qui i soit et qui le miex jousta,
« Car bien connois celui qui bien deservi l’a,
« Si que, a mon povoir, je croy le pris avra.
« Je pri Dieu que pendus soit cilz qui en faura,
« Et qui a son povoir bien ne l’asenera. »
Moult en y ot de tiex a qui li cuers trembla,
Car chascun des joustans le pris avoir cuida,
Mais certes c’uns tous seus avenir n’i pourra.
Quant li hyraus ot dit, oiant tous, ses pensées,
Aus .ij. dames s’en vint cointement acemées
Qui orent sur leur chief .ij. couronnes dorées ;
De riches dras de soie estoient aournées,
Et d’autres paremens si gaiement parées,
- ↑ — 2361. Et si y ot. — 2366. Diex.
