Puis montent esch[ev]aus chascun de cuer joiant ;
Adont s’en sont venus bellement chevauchant,
Por ce que li petis enfes aloit dormant ;
Enmi de la forest s’en vindrent tout parlant ;
Mais Bruians s’en aloit tout melancolïant,
Car il li souvenoit de la dame plaissant
Qui son seingneur ot mort, qui faissoit duel si grant,
Onques dame ne fist plus grant en son vivant ;
Mais nonpourquant Bruians l’ala tout oublïant
Pour l’enfant qu’il tenoit entre ses bras devant.
Ainsi ont trespassé le bois de Bersillant.
Quant il orent passé la grant forest pleniére,
Il ont trouvé leur gent delés une riviére :
Li uns estoit es prés, l[i] autre en la gachiére,
Chascuns se deduissoit toudis a sa maniére.
Et quant Bruiant les vit si leur fist belle chiére,
Car il leur raportoit unne nouvelle chiére.
Li .iiij. chevalier a tout le bel tresor
Qui estoit engenrés du propre sanc Butor,
Li autre chevalier atendoient encor ;
S’estoit chascuns montés sur un bon cheval mor,
Nul n’en i ot a pié : chascun ot brun ou sor.
Adont furent sonné des chevaliers li cor
Pour rasembler leur gent, tant d’ivoire com d’or ;
Le bois font retentir en bruiant comme tor,
Mais nus ne le savoit fors que li .iiij. encor.
A la Montaigne fu li enfes raportés