« Butor, s’il i a plus, li miens cuers vous supplie
« Que vous dites avant, il ne m’anoie mie.
— Dame, » ce dit Butor, « encor i a il el,
« Car elle li donna .j. gracïeus annel,
« Et le baissa .iij. foys avant qu’en son mantel
« Le mist revelopé, s’i ot moult biau jouel,
« Et vous le trouverrés dedens son doit manel :
« Si en devés mener grant joie et grant revel,
« Car il avra en lui .j. courtois jouvencel
« Et encor[e] sera sires de cel chastel,
« S’il plaist au roy des ciex et a saint Danïel,
« Car pour lui sont ja quis li chien et li oissel.
« Dame, » ce dit Butor, « j’ai esté moult pensans
« A quelle fin ce fu que l’unne fu donnans
« Que Bruns de la Montaine eüst paine et ahans ;
« Et qu’i ne fust amés et si seroit amans ;
« Et si redist ausi qu’il seroit parcevans
« Que s’amie seroit marïée en brief tans
« Et que nommés seroit par non petit Tristrans,
« Par ce que tant seroit d’amie mandïans,
« Car Tristrans qui ama Yseut grant plenté d’ans,
« Fu dolours et meschiés parfaitement sentans,
« Si que pour ce mes filz est son non restorans.
« Mais je me fui .j. pou a ce reconfortans
« Que la tierce li ert a ses besoins aidans,
« Et si le pourverra en lieu qui ert si grans
« C’onques de lui ne fu fame plus souffisans.
« Hélas ! et je sui mais anciens et pesans,
« Si croy que je n’er pas, ne moy ne vous, vivans. »
