La dame li respont : « Diex en soit aourés
Quant Bruns de la Montaingne ert si bien assenés !
« Butor, ne vous en chaut s’a ce tans ne vivés,
« Mais aucuns de ces fais moult bien veoir pourrés.
« Quant il aura .xij. ans chevalier le ferés ;
« Et si faites ausi qu’il puist estre esprouvés,
« Car en .j. seul poingneis son hardement verrés.
« Et vous requier por Dieu que bien l’endotrinés
« D’armes et de chevaus, car assés en savés,
« Et plus n’avons d’enfans, s’en doit miex estre amés,
« Et de lui comjouïr tant qu’il soit alevés,
« Car, loués en soit Diex, il est bien estrinés ;
« Onques mais ne fu miex enfes de mére nés.
« S’en doit estre de nous loée Trinités
« Quant Bruns de la Montaigne est si bien asenés.
— Dame, » ce dit Butor, « se vit .x. ans passés,
« En fait d’armes sera si bien amesurés
« Qu’il sera chevaliers et en joustes armés. »
Adont s’en est Butor hors de la chambre alés,
Et si dit : « Dame, a Dieu soit vos cors commandés,
« Je croy bien qu’en la salle ai esté demandés.
« Or vous requier pour Dieu que vous vous reposés
« Jusques adont qu’a vous me serai retornés. »
Butor de la Montaigne est de la chambre issus,
Avec les chevalier[s] est ou palés venus.
Tout li plus souffisans s’est a ses piés cheüs,
