Huimais m’orrés parler de la courtoisse fée
Qui donna a l’anfant par bonne destinée
Qu’elle le nourriroit d’amoureuse pensée ;
Et quant poins en sera ma matére ert tornée,
Comment la jouste fu en honnour achevée,
Et trés jouieussement ou chastel demenée,
Dont il en fu partout moult grande renommée
Et ce fu de raisson, ce est chose prouvée.
Ainsi que Butors fu entre lui et sa gent,
Par dedens son chastel bel et courtoisement ;
Et que chascuns faissoit joie joieusement
Pour l’enfant qui estoit nez tout nouvelement,
Adont parla la dame a Butor doucement,
Et dist : « Sire, pour Dieu, je ne sai vraiement
« Comment vos enfes puist estre nourris briement,
« Car je n’ai point de lait, sachiez certainement,
« Dont vivre se peüst, sans autre, longuement ;
« Si que je vous requier trés amoureusement
« C’une nourice aions pour nourrir le cors gent
« De Brun de la Montaigne ; or faites vistement,
« Car grant besoing en a, selonc mon ensient. »
Einsi que parlement tenoient ou chastel
De Brun de la Montaigne, .j. courtois damoisel,
A la porte s’en vint sur .j. cheval moult bel
Une dame plaisans qui chevauchoit isnel ;
Avecques li venoit .j. courtois jouvencel
Qui bien estoit montés sus un cheval grisel.
— 1859. Miniature avec cette rubrique : Coment la fée qui avoit proumis a nourir l’enfant vint ou chastel, et coment Butor li fist baillier son filz pour nourir.
