« Que vous me retenés avecques vo meisnie,
« Car je sui gentilz fame et de haute lignie.
« Si sui de mon païs, n’a pas trois jors, partie ;
« Or est mors mon seigneur, du cors osté la vie.
« Et s’avoie .j. enfant ausi qui ne vit mie,
« Lequel je nourrissoie et avoie en baillie.
« Si sui venue a vous, car on me certefie
« Que vo mouillier ajut hier, en la nuit serie.
— Dame, » ce dit Butor, « vous soiés bien venue :
« J’ai .j. petit enfant dont elle est ageüe,
« Si que pour le garder vous serés retenue,
« Et si serés des dras a ma fame vestue,
« Et après son relief vous porterés sambue,
« Car plus belle de vous ne puet estre veüe. »
Et quant des chevaliers fu la dame entendue
Il n’i ot si senés cui li sans ne remue,
Car ce com pot veoir de sa char toute nue
Estoit plus blans que nège en .j. pré estandue.
Adès de plus en plus est sa biauté creüe,
Et quant des chevaliers estoit bien parceüe,
Chascun d’eus desiroit qu’elle fust a li drue.
Quant Butor ot assés a la dame parlé,
Chascuns des chevaliers fu pris pour sa biauté,
Bacheler, jouvencel, et tout li marïé.
Et Butor en la chambre a la dame mené
Qui gissoit de l’enfant dedans .j. lit paré.
