Sor l’escu de son col feri un Alemant,
Par sor la bocle a or li peçoie et porfent,
Le haubert de son dos li desmaile et desment,
Le cuer qu’il ot ou ventre en .ij. moitiez li fent.
Toute plaine sa lance l’abati mort sanglant,
Et escria : « La Roche ! » tost et isnelement.
La force les enchauce environ de touz sens.
Asson et Guinemant en apela Landris,
Li niés le roi de France, li damoiseaus gentiz :
« Ceste gent qui nos sivent et a hu et a cri
« Ne me garde[nt] honor por mon oncle Pepin.
« Mais mielx morir volroie que n’i voise ferir. »
Il a brandi la lance au confenon porprin ;
Joserant de Cologne va en l’escu ferir ;
Par sor la bocle d’or li peçoie et malmist
Et l’aubert de son dos desmailla et rompist ;
Le cuer qu’il ot ou ventre en .ij. moitiez fendi,
Tote plaine sa lance l’abati mort sovin,
Puis rescrie « La Roche ! chevalier, ferez i ! »
Guinemanz fiert .j. autre, li proz et li hardiz,
Que mort l’a abatu devant lui ou larriz ;
Et Asses de Maience lor a le quart ocis.
Esperonant s’en vont delez l’aigue du Rin ;
N’i avront huimais garde de toz ceus de la cit.
Damedieus les garisse, qui en la croiz fu mis.
Tomiles fu navrez, s’en fu grains et marriz,
Et Malingres le plore et sa mere autresi.
Atant es Guenelon et Hardré son cousin ;
Asamblé avec eus si estoit Aloris
Et Hervis de Lion, li cuverz de put lin,
- ↑ — 1115 P. s. la bloc a or ; cf. v. 2297. — 1116 desmaille. — 1123 du rus. — 1126 grains, ms. grieus. — 1129 avec, ms. auos.
— 1101 ferut. — 1102 P. sur, perçoie.