Que nouvielles ne fust en cascune partie
De la haulte scienche ou elle estoit nourie
Et de sa grant biauté, qui luist et reflambie.
À treze ans fu si bielle, si douche et agenssie,
Parfaitte en tous estas, sage, bielle nourie
N’est homs, se il le voit, qui n’ait le chiere lie ;
Et dist li uns a l’autre : « Douche Vierge Marie,
Ou sera pris li homs en ceste mortel vie
Qui aviengne a l’onneur et a le signourie
De Florenche, no dame, qui tant est adrechie ? »
Ostez li empereres souvent s’i esbanie,
Le hault Dieu de lassus en aoure et grascie :
« Aÿ ! fille », dist il, « Jhesus te benaÿe,
Que j’en doy Dieu loer qu’en bien te mouteplie ! »
Ostez li empererez fist fourment a loer.
Liés estoit de sa fille, qui le viaire ot cler,
Du sens dont il veoit le sien corps doctriner
Et de la grant biauté ou il le voit former,
Car en bonnes coustumez le volt si ghouvrener
Que n’est nuls homs vivans qui y sache amender.
Or s’avise li rois cui li polra donner ;
Pour l’amour de sa fille fait tournois estorer,
Festez et ronde table en maint paÿs criier
Et ces lanches brizier, chevaliers behourder,
Comtes, ducs et barons venir et assambler ;
Pour veÿr les hardis, pour les preux aviser
Moult y viennent baron et comte et ducq et per.
Encor n’est point venus li jours de l’assener
Ne cheux qui le volra avoir et espouzer,
Mais par tans le volra veÿr et esgarder.
Car en Hongrie estoient doy hardi bacheler ;
- ↑ 156 Lieus — 158 grande — 164 cheualier — 168 Encore.
142 elle manque — 145 bielle et n. — 146 honme — 148 mortelle
