Li messagiers de Gresse, qui moult estoient fier,
Sont reméz a l’ostel jusques a l’esclairier ;
L’endemain au matin sont aléz au moustier.
Li empererez Ostes, qui tant fist a prisiér,
Se leva au matin, un peu s’ala arrier,
Puis fist messe canter pour Jhesucris priier,
Et, quant il ot oÿ le Jhesucris mestier,
Adont li prist volente qu’il yroit en gibier.
Maint faucon fist porter et maint noble esprevier,
As camps ala voler pour lui esbanoiier ;
A la court repaira environ le mengier.
Enssi conme il montoit sus ou palais plainnier,
Sont venus li Grigois qui furent messagier ;
Par devant l’empereur se vont agenouillier ;
L’empererez les fist humblement redrechier
Et puis se leur a dit : « Bien viengniéz, chevalier !
Dont yestes vous, signeur, pour Dieu le droitturier ? »
Acaries respond : « Ne le devons noiier :
Nous sonmes droit de Gresse, le boin paÿs plannier,
Honme le roy Garssille, le noble gherroiier, ».
Che dist li empererez : « Se vous en ay plus chier !
Que fait li rois Garssiles ? Pour Dieu le vous requier.
— Sire », dist Acaries, qui le corps ot legier,
« S’est poissans homs et nobles et fait moult a prisier
Et rices homs d’argent et d’avoir et d’or mier,
Encore a tel tresor li rois a justichier
Ne le menroient point, je croy, trente sonmier,
De fin or monnaé pour saudeez baillier,
Sans les nobles joyaus c’on ne puet esprisier.
— Signeur », dist l’empereres, « tout che devéz laissier,
De savoir la riquesce n’y a or nul mestier,
Fors qu’il soit en santé et qu’il se puist aydier
332 oston — 334 camter — 342 se sont — 343 Li — 346 Et acairez ; deuez vous — 348 la n. — 357 espriuier — 558 ? ? li e. — 359 ny ore.
