Il se doit conssillier a se gent a dinee.
— Or tos ! » che dist Flourenche, « n’y faittes demoree !
Aléz dire Agrevain a le brache quarree
Et Sansson de Tarente, qui moult a renonmee,
Qu’il viengnent chi a moy sans point de l’arriestee !
Consseilleur sont au roy de Ronme l’onnouree,
Et je vorray a yaus retraire ma penssee,
Car j’ameroie mieus que je fuisse thuee
Qu’a Gharssilles le roy estre ja assenee,
Car on dist pour chiertain Par toutte la comtree
Qu’il est lais et hideus, s’a la barbe meslee,
S’a plus rougez les yeus que feu de queminee,
Ja ne plaise chel Dieu qui fist chiel et rouzee
Qu’a un tel viellart soie baillie ne livree,
Car me biauté seroit laidement deghastee !
Alés dire a ces deus dont je fay devisee
Qu’il viennent chi endroit en me chambre listee ! »
Et chieus a respondut : « Tout a vo deziree ! »
Viers le palais s’en va courant de randonnee,
Et Flourenche de Ronme est ylloecq demouree ;
A soy meïsmes dist : « Douche Vierge loce,
Je voy bien que je sui de clergie fondee,
Car au cours vis l’autrier con je sui destinee,
Dont je croy que, se Dieus ne m’aide ceste anee,
Qu’a grant tourment sera li chars de moy livree,
Mais bien say qu’en le fin en seray delivree,
Ou li estoille ment ou je me sui fondee. »
Enssi disoit Flourenche, ou moult avoit de sens ;
Et li boins chevaliers, qui fu claméz Flourens,
Est venus au palais, ou moult avoit de gens,
L’empereour trouva, qui tant fu exellens,
- ↑ 454 Li empereres.
428 viengne — 436 chel manque — 441 vostre d, — 442 Deuiers — 443 ylloecques — 446 conme je
