Et li rois le cincquime, qu’avoecques lüi mena
Millon et Esmeret, qui grant honneur porta,
Car il furent royal et pour ce les ama.
La sonnerent maint cor et de cha et de la ;
A l’issir hors de Ronme telle noize leva
Que li os roy Gharssilles si s’en apparella.
Li rois fist ordener son ost qu’il ot droit la :
Dessus les prez de Ronme sa baniere porta,
Et la endtoît li ost cascuns s’i aprocha.
A aprochier les os li noize si monta
Que le tiere a bondi et tenti et crola.
Flourence la puchielle moult tenrement plora
Pour le grande battaille que pour lui conmencha.
« Aÿ ! lasse », dist elle, « que mallement me va,
Quant tant de bonne gent pour moy morir fauldra !
Mieus amasse d’asséz, par Dieu qui tout crea,
Si pleuist a Jhesus, morte fuisse piech’a ! »
A l’assambler les os fu grande la meslee,
Et la fu mainte trompe et bondie et sonnee,
Et d’unne part et d’autre fu grande la criee,
Si que tout en tentist li mons et li valee.
La ot maint point trenchiet, mainte thieste coppee,
Et de maint cheval fu la panche esboiellee
Et-maint chevalierz mors, gisant gheulle baee.
Agrevain y fery a deus mains d’une espee,
Devant le roy Gharssille a l’enssengne verssee.
Ja fuissent Grigois mors droit la en la meslee,
Mais sus Agrevain fu telle priesse tournee
Qu’il ont mort son cheval a le cruppe tieullee
Milles et Esmeréz n’y firent arriestee,
Maint Grigois y ont mort, dont lame fu ostee ;
- ↑ 903 de unne : dautre part — 907 bee — 908 de vne — 912 trieullee — 914 luue (?) fu.
