Tant y fierent le jour par viertu esprouvee
Qu’il l’ont fait remonter entre le gent dervee ;
Le danssiel Esmeret, cuy ame soit sauvee,
Li donna un cheval qu’il conquist le journee.
Quant li bers Agrevains fu a cheval remis,
Il en fu a son coer durement resjoÿs.
A Esmeret a dit : « Sire, cincq cens mierchis !
De vostre courtoisie ne vous sera point pis,
Ne vous, sire Millon, car moult estez hardis ! »
A ycelle parolle conmencha li estris,
Entre Grigois fu grans et fiers li paletis,
Et d’unne part et d’autre en y a tant d’ochis
Que deseure les mors vit on passer les vifs,
Et dou sancq de leur corps en fu li camps rougis,
Ostes li empereres y fery sans advis.
Es vous le roy Gharssilles qui s’escrie a hault cris :
« Ou es tu, empererez, faus traïstres falis ?
Tu fezis grant oultrage, qui ta fille escondis
Au plus poissant qui soit de chi jusqu’a Paris,
Je te defy de Dieu, le roy de Paradis :
Ja mais n’arriesteray, si en seras ochis.
Puis averay ta fille, qui tant a cier le vis,
Et o lui coucheray cincq sepmaines u sis ;
Quant en seray tanez, je te jure et plevis
Que je l’abandonray a trestous mes marchis
Et apriès as gharchons trestous les plus quetis ;
Puis le feray ardoir a ghuise de Juis, »
Ostes li empereres a bien ces mos oÿs :
« Ayuwe ! Dieus », dist il, « perez de Paradis,
- ↑ 922 S. japoint — 923 ostez h. — 926 de vanne — 927 Après le v. 927 est intercalé le vers : Et de vnne part et dautre en y a tant dochis (cf. v. 926) — 935 sera — 936 tant f. ; a le cler v. — 939 la bandonneray.
916 Qui — 918 qui c.