Morir maint chevalier a trez crueus vierssal !
Bien s’i est esprouvéz Esmeréz le loyal,
Et ossi fist Millon, qui depuis li fist mal.
Li empereres jure le Pere esperital
Que de Millon fera son maistre marescal
Et li donra sa fille au corps especial ;
En son coer l’enama, et tout pour le cheval
Qu’au besoing li avoit rendu en cel journal.
À Sansson de Tarente, le prince natural,
Sont venus maint Grigois qui livrerent assal,
Et il reclama Dieu et l’enssengne royal.
Esmeréz l’a oÿ, qui l’i vit rendre estal ;
Celle part s’adrecha a loy d’empereal.
Quant Esmeréz choyzi Sansson, qui fu queüx,
Celle part s’adrecha, n’y est aresteüx ;
La lanche ot en son poing, au col fu li escus.
Va ferir un Grigois qui ot non Mellidus :
Cousins estoit Garssilles et moult estoit ses drus.
Esmeréz le fery dou fier qui fu aghus ;
Li haubiers n’y valy vallissant deus fiestus.
Ou corps li mist le fier, d’autre part est queüs,
Au rasacquier la lanche queÿ a tiere jus.
Il a pris le cheval, qui fu grans et corssus,
Et a dit a Sansson : « Chevalier, levéz sus,
Se prendéz le cheval, car pour vous fu tolus ! »
Et quant Sansses le vit, si en loa Jhesus ;
Bien congnut Esmeret, qui tant estoit membrus,
Au blazon qu’il tenoit fu par lui congneüx,
Car de gheulles y ot deus lions fourchelus ;
Ourlé d’or et de sawle, enssi fu li escus.
Lors li a dit Sansson : « Chevaliers assolus,
Je prie a Jhesucris, qui pour nous fu vendus,
- ↑
981 celle j. — 982 la prince.