S’elle se marioit par aulcune ocquoison,
Qu’Esmeréz de Hongrie li venroit moult a boin.
Ez vous les pers de Ronme dont je fay mention ;
Agrevain a parlé, n’y fist demourison :
« Dame, Jhesus vous gard, qui Longis fist pardon ! »
Et elle respondi douchement a bas son :
« Bien soiiés vous venus, signeur noble baron ! »
« Signeur », dist la puchielle, qui fu bien doctrinee,
« Bien soiiés vous venus en ma chambre paree !
— Dame », dist Agrevains, « a bien fustes vous nee !
Dame, nous vous dirons, si vous plaist, no penssee.
Il est bien veritéz et raison ordonnee :
Mors est li empereres ; son ame soit sauvee !
Or est toutte la tiere en vo nom demouree,
Si en devéz de droit yestre dame clamee ;
Mais tiere qu’est a dame n’est mie bien gardee,
S’elle n’a un signeur a qui soit assenee ;
Et pour chou loons nous que sooiéz mariee :
Et vous avons trouvé signeur sans demoree
De qui vous seréz bien et siervie et amee
Et le tiere de Ronme garandie et tenssee,
Se loons, si vous plaist, qu’i soiiés acordee
A nostre volenté sans yestre en riens tourblee.
— Signeur », che dist Flourenche, « trop seroie hastee,
S’a honme je me soie si tos habandonnee,
— Dame », dist Agrevain, « vous seréz affyee,
Et en fin de la gherre, quant el sera oultree,
Adont seroit dou tout ceste chose aquievee.
— Signeur », dist la roÿnne, qui blanche fu et nee,
« N’est pas drois ne raisons que riens je vous devee.
Dittes vostre raison, de moy yert escauttee,
- ↑ 1265 qui est — 1268 Et nous v. — 1274 Se a — 1276 en la ; elle — 1278 fu que nee.
1252 les perez