Et ses freres Millons, qui tant ot hardement,
Estoit dedens sa chambre, ou moult fort se repent
De che qu’il ot parlet as barons enssement
Et qu’il ot pris consseil d’avoir avizement.
Sus son lit se gietta et manda vistement
Esmeret, le sien frere, mais il n’estoit noiient
La ou on le querroit, car il tient parlement
A la francque puchielle, qui de biauté resplent.
Esmeréz li vassaus, qui tant ot le coer vray,
Estoit daléz Flourenche, qui tant ot le coer gay.
La bielle l’appiella, se li dist sans delay :
« Esmeréz », dist Flourenche, « oiiés que je diray !
De vostre vasselage moult parler oÿ ay ;
Bien vous yestez portéz, pour che vous en donray
Chestui aniel d’or fin ; pas ne le plainderay.
— Dame », dist Esmeréz, « et je le prenderay.
Se ne l’ay desiervy, je le desierviray. »
Esmeréz prist laniel, qui moult fu de hault pris,
En son doy le boutta volentiers, non envis ;
Puis dist a la puchielle : « Se j’ay esté hardis
De prendre cest aniel, foy que doy Jhesucris,
À trés exellent fait il sera desiervis.
— Esmeret », dist la bielle, « se li dons est petis,
Bien polréz meudre avoir ains deus mois acomplis,
— Bielle », dist Esmeréz, « a vous cincq cens mierchis !
Mais il ne vous desplaise, douche dame gentils,
Se je demande a vous, puchielle de hault pris,
Che qu’a l’aniel affiert de quoy je sui siervis !
— Nennil », che dist Flourence, « si m’aït saint Remis !
- ↑ 1363 que je d. — 1369 Se manque — 1370 a l’ manque.
1343 Et les — 1348 nestoient n.
