Flourenche la puchielle fourment se hontoia :
« Aÿ ! lasse », dist elle, « qu’a dit chieus vassaux la ?
Et fault il conssillier, qui un si fait don a ?
Par le foy que je doy Celui qui me fourma,
Ja mais en son vivant a fenme ne m’ara ! »
Quant Milles de Hongrie ot parlet ensement,
Moult bien dire cuida, mais il dist nicement ;
Des barons departi et a yaus congiet prent.
Et Flourence remest, qui le coer ot dolent ;
Elle a dit as barons a se vois haultement :
« Signeur », che dist Flourence, « je vous ai en couvent
Que ja mais a nul jour, par le mien sairement,
N’espouzeray Millon, qui orghuilleuzement
A demandé consseil et parlé follement ;
Mais, s’il n’avoit plus d’onmes jusques l’Arbre qui sent,
Si n’ara il ja mais a moy part ne couvent.
— Dame », che dist Sansson, « vous parléz sagement.
Par la foy que je doy a Dieu omnipotent,
J’avoie au coer de my pris otel sentement :
C’estoit a l’autre frere, par le mien sairement.
— Sire », che dist Flourenche, « or parléz coyement !
Je saray s’ille vault et s’il a l’essient,
Car, se je le pierchoy niche ne negligent,
Ja n’y metteray coer ne corps n’entendement. »
Adont li chevalier en font departement,
Et la bielle remest, que Dieus gard de tourment !
Or oiiés qu’elle fist, la puchielle au corps gent :
A Esmeret manda trestout priveement
Qu’a lui venist parler tos et inconttinent.
Audeghons le trouva, qui moult ot d’enssient,
Ou juoit as eschiés en my le payement.
- ↑ 1326 se il — 1329 a manque — 1333 seil ; se il — 1334 ne niche ne — 1335 ne manque.
