Un senter ancïen, foilus, d’erbe covert
Vit Rolant a senestre, a l’entrer dou desert :
E lu e son cheval s’i mis a vis apert.
Li troi le seguirent, qi a lui sunt oufert :
A bandon se sont mis, ja nul ne s’en espert.
E Rolant les conforte, qi dit : « Por sant Erbert,
« De trover les ost Charles croi le chemins overt. »
Mais ancoi troverunt, si con le livre afert,
Qui lor feront paor avant qe nul s’aobert ;
N’avront si aut coraje q’i ne s’an desahert,
Con vos porois entandre, se li chant oïs ert.
A l’ensir dou boschaje e a l’entrer d’un gaut,
Bien prés d’une montagne dun li poi furent haut,
Garde Rolant a destre, e vit en son blïaut
Un mort ou pré geisir, qi n’estoit mie qaut :
Le bu gisoit versié, dou chief avoit defaut ;
Grant estoit e membru, mais humés petit vaut.
Le bon ceval Rolant le voit, si done un saut,
En autre part guenchi, d’autre voie li qaut.
Rolant le point e dist : « Alés avant, ribaut. »
E Hue li eschrie : « Sire, por sant Tibaut,
« J’ai tel cosse veüe q’ancois qe l’en s’en aut
« De cist voiaje a chief, bataile ne nos faut.
— Gardés ci, sire, un hon q’a vestre milsoudor