Capel oit et sclavine e bordon pomerin ;
De troiter estoit lais a guise de toipin.
Rollant l’a coneü tantost al cief enclin ;
De la renge se muet, armez, sor Vaillantin,
E quant il li fu prés, si li dist en latin :
« Ais tu bien esploité ? — Oïl, par sant Martin,
« Car Noble vos donrai demain a le maitin.
« Sire », ce dist Bernars, « de venir sui tot lais ;
« Da Noble sui torné, la o tu me mandais.
« Tot entor l’ai cerqé et neïs le palais ;
« Demain la te donrai ; ven o moi, si l’avras.
« Nulle gient da defandre laienz n’i troverais,
« Car il sunt ça venus a l’estor qe tu fais ;
« Ainz q’il tornent ariere, car vien en es le pais,
« Car bien poroies perdre, se avant ne lor vais.
— Di moi », feit li li quens, « se dainz nos condurais.
— Oït », ce dist la spie, « senz mal et senz forfais :
« Non sun ton compagnons por feir l’uevre Judais. »
Lor en mercie Dex Rollant et saint Tomais
E l’apostre saint Jaqes, par cui a pris li fais
De conqueir son chemins, dont oit paine e mesais.
« Bernard », ce dist li quens, « par Diex, conseile moi.
« Volenter i veroie, mais je redoit le roi
