Mais s’il verent les fers des lances aguz clier
Qe furent en agait joste les oliviers,
E verent les barons, none senblent pais bergiers,
Taisans et embrunciez cum furent costumiers ;
Atendrent qe Paiens venisent as graviers.
Lors se ratenirent les culvers losangiers ;
Ja d’euls ne s’an desflote neis uns des escüers.
Pains s’aresterent e laserent la caçe
Quant il apercoivrent des chevalers la traçe,
Car il sevent de voir, se el plain les alaçe,
Ne tornerunt ariere si ert saignie mainte façe ;
Lor n’en partist uns d’eus par tot l’or de Dalmaçe.
Grandonie vient dejoste Isorez, si l’abraçe :
« Veïs tu jameis, frere, Machun bien te face,
« Gient que men redotast lor nemis ne menaçe
« Come font ces François, cui Machomet mesfaçe ?
« Pires nos tienent ceires ne fet li feu la glaçe ;
« Mais neporquant pieç’a qe conus lor mentaçe.
« Bien serunt ançignos s’en celui plain m’atraçe :
« Je ne sai mains de lor com vers Curaz Oraçe.
« Encui ne moi ferunt cose qe moi desplaçe. »
Atant ec vos pongant l’Augalie de Traçe,
Malçeris l’amirafle, l’Aumensor de Galaçe
E Balegant le rois, en son poing une maçe,
Falseruns d’autre part, qe feir se font grant plaçe,
E bien plus de dis mile ; n’i cil n’ait gleive ou haçe.
Defors la rice porte s’arestent les mesnees.
